عادل راجہ کا دماغ ٹھکانے آگیا،بریگیڈیئر(ر)راشد نصیر سے معافی مانگ لی،ہرجانہ ادا کرنے کا بھی اعلان

لندن(جانو ڈاٹ پی کے)یوٹیوبر عادل راجہ نے بریگیڈیئر(ر)راشد نصیر سے جھوٹے الزامات اور کردار کشی پر معافی مانگ لی۔

سماجی رابطے کی ویب سائٹ ایکس پر جاری معافی نامے میں عادل راجا نے لکھا کہ عدالت نے کہا جون2022میں لگائے گئے الزامات بے بنیاد اور ہتک آمیز تھےاور9اکتوبر2025کو فیصلے میں مجھے ذمہ دار ٹھہرایا گیا۔

عادل راجا نے ٹویٹ میں کہا کہ مجھے راشد نصیر کو50ہزار پاؤنڈ ہرجانہ ادا کرنے کا حکم دیا گیا ہے،عدالت نے میرے خلاف قانونی اخراجات بھی منظور کیے ہیں۔بے بنیاد الزامات کا اعتراف کرتے ہوئے انہوں نے کہا کہ14سے29جون2022کے دوران میں نے ہتک آمیز الزامات لگائے تھے اور میرے پاس ان الزامات کا کوئی دفاع موجود نہیں تھا۔لہٰذا میں لندن ہائیکورٹ کے فیصلے کے مطابق معافی مانگتا ہوں۔عدالت نے ہدایت کی تھی کہ مجرم عادل راجا 22 دسمبر سے پہلے معافی مانگے اور معافی 28 دن تک سوشل میڈیا اکاؤنٹس پر نمایاں رکھنے کا حکم دیا گیا تھا۔

عدالت نے اپنے تفصیلی فیصلے میں کہا کہ عادل راجا نے جون 2022 میں جو الزامات عائد کیے تھے، ان کے حق میں کوئی قابلِ قبول ثبوت پیش نہیں کیا گیا اور یہ تمام دعوے محض بہتان اور شخصیت کشی پر مبنی تھے۔

عدالت نے انہیں 2لاکھ 60 ہزار پاؤنڈ (9کروڑ 72 لاکھ روپے) بطور عبوری اخراجات فوری طور پر ادا کرنے کا حکم جاری کیا ہے اور واضح کیا ہے کہ تمام مالی واجبات 22 دسمبر 2025 تک ادا کرنا لازمی ہوں گے۔