ایران جنگ اور مذاکرات دونوں کے لیے تیار ہے، صورتحال مکمل کنٹرول میں ہے، عباس عراقچی

تہران(مانیٹرنگ ڈیسک) ایرانی وزیر خارجہ عباس عراقچی نے کہا ہے کہ ایران کسی بھی ممکنہ صورتحال سے نمٹنے کے لیے مکمل طور پر تیار ہے، چاہے وہ جنگ ہو یا مذاکرات، اور ملک میں موجودہ حالات اب مکمل طور پر کنٹرول میں ہیں۔

اپنے بیان میں عباس عراقچی نے کہا کہ گزشتہ ہفتے کے اختتام پر ملک میں تشدد میں اضافہ ہوا، جہاں دہشت گرد عناصر نے مظاہرین اور سکیورٹی فورسز کو نشانہ بنایا۔ ان کے مطابق ابتدا میں ہونے والے پرامن مظاہرے بعد ازاں پرتشدد رخ اختیار کر گئے۔

ایرانی وزیر خارجہ نے بتایا کہ گزشتہ دو ہفتوں کے دوران احتجاج کے دوران تقریباً 350 مساجد کو نذرِ آتش کیا گیا، تاہم سکیورٹی فورسز نے حالات سے نمٹنے کے لیے انتہائی ضبط اور تحمل کا مظاہرہ کیا۔

انہوں نے کہا کہ مظاہرین کے مطالبات جائز تھے اور حکومت ان مطالبات کو سن بھی رہی تھی، تاہم امریکی صدر ڈونلڈ ٹرمپ کی جانب سے مداخلت سے متعلق بیانات کے بعد صورتحال بگڑی، جس کا مقصد بیرونی مداخلت کا جواز پیدا کرنا تھا۔

عباس عراقچی نے واضح کیا کہ ایران اپنے قومی مفادات کے تحفظ کے لیے ہر آپشن پر تیار ہے، اور کسی بھی دباؤ کے آگے نہیں جھکے گا۔

واضح رہے کہ امریکی صدر ڈونلڈ ٹرمپ نے حالیہ بیان میں دعویٰ کیا تھا کہ ایران نے مذاکرات کے لیے رابطہ کیا ہے، تاہم انہوں نے ساتھ ہی ایران کے خلاف فوجی کارروائی کے آپشنز پر غور کرنے کی دھمکی بھی دی ہے۔