نیپرا نے صارفین پر بجلی بم گرا دیا

اسلام آباد(جانوڈاٹ پی کے)نیشنل الیکٹرک پاور ریگولیٹری اتھارٹی (نیپرا) نے دسمبر کی فیول پرائس ایڈجسٹمنٹ کے تحت بجلی کی قیمت میں اضافے کی منظوری دے دی ہے۔ نوٹیفکیشن کے مطابق بجلی فی یونٹ 28 پیسے مہنگی کر دی گئی ہے، جس کا اطلاق فروری کے ماہانہ بلوں میں کیا جائے گا۔

نیپرا کی جانب سے جاری نوٹیفکیشن میں واضح کیا گیا ہے کہ یہ اضافہ ملک بھر کے صارفین پر لاگو ہوگا، جس میں کے الیکٹرک کے صارفین بھی شامل ہیں۔ تاہم لائف لائن صارفین اور الیکٹرک وہیکل چارجنگ اسٹیشنز کو اس فیصلے سے مستثنا قرار دیا گیا ہے، جس کے باعث ان صارفین کو اضافی مالی بوجھ برداشت نہیں کرنا پڑے گا۔

واضح رہے کہ سینٹرل پاور پرچیزنگ ایجنسی نے نیپرا میں دسمبر کے ماہانہ فیول پرائس ایڈجسٹمنٹ کے تحت فی یونٹ 48 پیسے اضافے کی درخواست جمع کرائی تھی۔ نیپرا نے اس درخواست کا جائزہ لینے کے بعد 28 پیسے فی یونٹ اضافے کی منظوری دی اور باقاعدہ نوٹیفکیشن جاری کر دیا۔

ماہرین کے مطابق یہ اضافہ صارفین کے بجلی کے بلوں میں معمولی مگر واضح فرق ڈالے گا، جبکہ حکومت اور متعلقہ ادارے صارفین کو توانائی کی بڑھتی ہوئی قیمتوں سے نمٹنے کے لیے احتیاطی تدابیر اختیار کر رہے ہیں۔