پاکستان ابراہیمی معاہدے کا حصہ نہیں بنے گا،دفتر خارجہ

اسلام آباد (جانوڈاٹ پی کے)وزارت خارجہ کے ترجمان طاہر حسین اندرابی نے واضح کیا ہے کہ پاکستان کسی بھی ابراہیمی معاہدے کا حصہ نہیں بنے گا اور اس کا ابراہیمی معاہدے سے کوئی تعلق نہیں ہے۔ انہوں نے کہا کہ پاکستان انٹرنیشنل سٹبلائزیشن فورس میں بھی شامل نہیں ہوگا، اور بورڈ آف پیس اور سٹبلائزیشن فورس کے درمیان کوئی تعلق نہیں ہے۔

دفتر خارجہ کے ترجمان نے ایران میں کشیدگی کے حوالے سے کہا کہ پاکستان ہمیشہ پرامن طریقے سے مسائل کے حل پر یقین رکھتا ہے، اور طاقت کے استعمال یا اقتصادی پابندیوں کے حق میں نہیں ہے۔ پاکستان امید کرتا ہے کہ خطے میں امن قائم رہے گا۔

تجارتی تعلقات پر بات کرتے ہوئے ترجمان نے کہا کہ پاکستان اور یورپ کے درمیان تجارتی حجم 12 ارب یورو سے زائد ہے، اور صدر زرداری نے یو اے ای کے صدر شیخ محمد بن زاید آل نہیان سے ملاقات میں سرمایہ کاری اور جاری منصوبوں کا جائزہ لینے پر زور دیا۔ دونوں ممالک نے پرچم بردار منصوبوں کے ذریعے سرمایہ کاری بڑھانے اور تجارتی تعلقات وسیع کرنے کے لیے مشترکہ اقدامات پر اتفاق کیا۔

ترجمان نے مزید بتایا کہ نائب وزیراعظم و وزیر خارجہ اسحاق ڈار نے ایران، بنگلہ دیش اور گھانا کے وزرائے خارجہ کے ساتھ ٹیلی فونک بات چیت کی اور علاقائی صورتحال اور دوطرفہ تعلقات پر تبادلہ خیال کیا۔ وزیراعظم کی ورلڈ اکنامک فورم ڈیووس میں شرکت کے دوران عالمی سربراہان سے ملاقاتیں ہوئیں، جبکہ ڈیووس سے واپسی پر متحدہ عرب امارات کا دورہ بھی کیا گیا، جس میں ٹیلی کمیونیکیشن کمپنی اتصالات کی پاکستان میں سرمایہ کاری پر بات چیت ہوئی۔

امریکا کی جانب سے پاکستان کے لیے جاری ٹریول ایڈوائزری کے حوالے سے ترجمان نے کہا کہ دونوں ممالک کے تعلقات معمول کے مطابق ہیں اور امریکا نے کچھ سابقہ ایڈوائزریز واپس لے لی ہیں۔ انہوں نے یہ بھی بتایا کہ قزاقستان کے صدر جلد پاکستان کا دورہ کریں گے، اور دونوں ملکوں کے درمیان ریلوے منصوبے پر ابھی کوئی پیش رفت نہیں ہوئی۔