لاہور ہائیکورٹ نے بسنت پر تصاویر اور گانوں کی پابندی کی درخواست آفس اعتراض کے بعد واپس کر دی

لاہور (جانوڈاٹ پی کے)لاہور ہائیکورٹ نے بسنت کے موقع پر پتنگوں پر تصاویر چھاپنے اور مخصوص گانوں پر پابندی کے خلاف درخواست کو آفس اعتراض برقرار رکھنے کے بعد واپس کر دیا ہے۔ درخواست پی ٹی آئی کے شیخ امتیاز کی جانب سے دائر کی گئی تھی۔

لاہور ہائیکورٹ کے جسٹس اویس خالد کی عدالت میں درخواست کی سماعت ہوئی، جس میں درخواست گزار کے وکیل اظہر صدیق نے موقف اختیار کیا کہ کسی بھی سیاسی رہنما کی تصویر پتنگ پر چھاپنے پر پابندی عائد کی گئی ہے، اور اس کے علاوہ گانوں پر بھی پابندی ہے جن میں “نک دا کوکا” شامل ہے۔ وکیل نے کہا کہ یہ گانا فحش نوعیت کا ہے اور اس میں سیاسی مواد شامل نہیں، اور بانی پی ٹی آئی کا نام صرف ایک بول میں آنے کی وجہ سے پابندی عائد کی گئی ہے۔

درخواست میں مزید کہا گیا کہ ڈی سی لاہور کا جاری کردہ نوٹیفکیشن غیر قانونی ہے اور عدالت اس پابندی کو کالعدم قرار دے۔

عدالت نے دوران سماعت ریمارکس دیے کہ وہ لیکچر نہیں سنیں گے اور درخواست گزار کو پابندی کے نوٹیفکیشن اور دیگر متعلقہ دستاویزات عدالت میں جمع کرانے کی ہدایت کی۔ رجسٹرار آفس نے درخواست میں کچھ خامیوں اور آفس اعتراضات کی نشاندہی کی، جس کے بعد عدالت نے درخواست گزار کو آفس اعتراضات دور کرنے کی ہدایت کی اور سماعت مؤخر کر دی۔