مسئلہ فلسطین مشرق وسطیٰ میں عدم استحکام کی جڑ ہے، پاکستان

نیویارک (جانوڈاٹ پی کے) اقوام متحدہ میں پاکستان کے مستقل مندوب عاصم افتخار نے فلسطین کے مسئلے کے تمام پہلوؤں پر اقوام متحدہ کے فعال کردار کا خیر مقدم کرتے ہوئے کہا ہے کہ مسئلہ فلسطین کا حل طلب رہنا مشرق وسطیٰ میں عدم استحکام کی بنیادی وجہ ہے۔

ایک بیان میں عاصم افتخار نے کہا کہ پاکستان فلسطین سے متعلق کھلے مباحثے کے انعقاد کا خیر مقدم کرتا ہے، کیونکہ فلسطینی عوام گزشتہ کئی دہائیوں سے ایک غیر قانونی قبضے کا سامنا کر رہے ہیں۔ انہوں نے کہا کہ پاکستان کو غزہ کی بگڑتی ہوئی انسانی صورتحال پر شدید تشویش ہے، جہاں جنگ بندی کی مسلسل خلاف ورزیاں ہو رہی ہیں اور عام شہریوں کی جانیں شدید خطرات سے دوچار ہیں۔

پاکستانی مندوب کا کہنا تھا کہ امدادی سرگرمیوں پر عائد پابندیاں متاثرہ آبادی تک انسانی امداد کی ترسیل میں بڑی رکاوٹ بن رہی ہیں۔ انہوں نے اسرائیل کی جانب سے غزہ میں جاری مسلسل حملوں کی سخت الفاظ میں مذمت کرتے ہوئے مطالبہ کیا کہ بورڈ آف پیس مستقل جنگ بندی، انسانی امداد کی بلا تعطل فراہمی اور غزہ کی تعمیر نو کے حوالے سے واضح اور ٹھوس پیشرفت یقینی بنائے۔