سانحہ گل پلازہ: ایف آئی آر منظر عام پر، غفلت و لاپروائی کی دفعات شامل، جاں بحق افراد کی تعداد 73 ہو گئی

کراچی (جانوڈاٹ پی کے)سانحہ گل پلازہ سے متعلق تھانہ نبی بخش میں درج مقدمے کی ایف آئی آر منظرِ عام پر آ گئی ہے، جس میں قتلِ خطا، قتل بالسبب، غفلت اور لاپروائی کی دفعات شامل کی گئی ہیں۔ مقدمہ پولیس انسپکٹر نواز علی کی مدعیت میں درج کیا گیا ہے۔

ایف آئی آر کے متن کے مطابق 10 بج کر 30 منٹ پر گل پلازہ میں آتشزدگی کی اطلاع موصول ہوئی۔ پولیس موقع پر پہنچی تو عمارت میں شدید آگ لگی ہوئی تھی اور بھگدڑ کا عالم تھا، جبکہ متعدد افراد عمارت کے اندر پھنسے ہوئے تھے۔

مقدمے میں انکشاف کیا گیا ہے کہ گل پلازہ میں آگ بجھانے کے مناسب آلات موجود نہیں تھے۔ واقعے کے بعد عمارت کا ملبہ اٹھانے کا کام مکمل کر لیا گیا ہے جبکہ گرین شیڈز لگا کر عمارت کو سیل کر دیا گیا ہے۔

سانحہ گل پلازہ کی تحقیقات کے لیے ڈی آئی جی ساؤتھ نے خصوصی تحقیقاتی ٹیم تشکیل دے دی ہے۔ ایس پی انویسٹی گیشن سٹی کی سربراہی میں پانچ رکنی کمیٹی قائم کی گئی ہے، جسے مقدمے کی تفتیش اور ذمہ دار ملزمان کی گرفتاری کا ٹاسک سونپا گیا ہے۔

ڈی آئی جی ساؤتھ کے مطابق سانحے میں جاں بحق افراد کی تعداد 73 تک جا پہنچی ہے۔ حالیہ دنوں میں ایک اور شہید شہری عبدالحسیب کی نمازِ جنازہ شارع فیصل پر واقع مرکزی مسلم لیگ ہاؤس میں ادا کی گئی۔