2ماہ میں دکانیں تیار،وزیر اعلیٰ سندھ کا بڑا اعلان

کراچی(جانو ڈاٹ پی کے)وزیراعلیٰ سندھ مراد علی شاہ نے سانحہ گل پلازہ کےمتاثرین کو2ماہ میں دکانیں تیار کرکے دینے کا اعلان کردیا۔وزیراعلیٰ سندھ نےمیڈیا سے گفتگو کرتے ہوئے کہا کراچی کا انفرا اسٹرکچر بہتر کرنے کیلئے کام کر رہے ہیں،عید کے بعد شاہراہ بھٹو کو ایم9تک شروع کردیں گے۔

انہوں نے کہا کہ گل پلازہ متاثرین کے ساتھ کھڑے ہیں،جس کی جان گئی اس کے لیے حکومت ایک کروڑ روپے دے گی اور گل پلازہ کی جگہ پر حکومت عمارت بنائے گی،5لاکھ روپے گل پلازہ کے ہردکاندار کو دیں گےتاکہ2ماہ تک گھر کا کچن چلا سکے،کراچی چیمبر کے ساتھ مل کر کام شروع کردیا ہے،نقصانات کو حکومت سندھ پورا کرے گی،دکانوں میں جو سامان پڑا تھاکراچی چیمبر کی مدد سے اسے پورا کریں گے۔مراد علی شاہ کا کہنا تھا کہ جب تک گل پلازہ بنے،2ماہ تک5لاکھ روپے دیں گے،2ماہ میں انہیں دکانیں مل جائیں گی تا کہ وہ کاروبار شروع کردیں،محکمہ سندھ انویسٹمنٹ کے ذریعے دکانوں کو ایک کروڑ روپیہ دیں گے،قرض پر سود حکومت سندھ ادا کرے گی،جتنی دکانیں تھیں اس سے ایک انچ بھی زیادہ نہیں بنائیں گے،دکانداروں کے ساتھ مل کر گل پلازہ کو دوبارہ کھڑا کریں گے۔

انہوں نے مزید کہا کہ گل پلازہ واقعے کا مقدمہ درج کروا لیا ہے، 80 سے اوپر جانیں ضائع ہوئی ہیں، ذمہ داروں کو سزا ہوگی، ہماری اپنی کوتاہیاں ہیں میں مان رہا ہوں، اس واقعے کے بعد دوسرے صوبوں میں بھی کمیٹیاں بن گئی ہیں، ہر بلڈنگ کا آڈٹ کرنے کا فیصلہ کیا ہے، ہم سب کو تہیہ کرنا ہے کہ ائندہ اس طرح کا سانحہ دوبارہ نہ ہوں۔