کرایہ داری کا حتمی اصول طے، مالک کے انتقال پر قانونی وارث ازخود مالک قرار

اسلام آباد (جانوڈاٹ پی کے)سپریم کورٹ آف پاکستان نے کرایہ داری کے حوالے سے ایک اہم اور حتمی اصول قائم کیا ہے، جس کے مطابق مالک کے انتقال کے بعد اس کے قانونی وارث از خود مالک تصور ہوں گے اور نیا کرایہ نامہ بنانا ضروری نہیں ہوگا۔

سپریم کورٹ نے سندھ ہائی کورٹ کا بے دخلی کا فیصلہ درست قرار دیا، جس میں کرایہ داروں کو دکانیں ساٹھ دن کے اندر مالکان کے حوالے کرنے کا حکم دیا گیا تھا۔ اس فیصلے کے خلاف دائر اپیل پر چیف جسٹس پاکستان یحییٰ آفریدی اور جسٹس شکیل احمد پر مشتمل دو رکنی بنچ نے سماعت کی۔ جسٹس شکیل احمد نے چار صفحات پر مشتمل تحریری فیصلہ جاری کیا۔

سپریم کورٹ کے فیصلے میں کہا گیا کہ اصل مالک کے انتقال کے بعد قانونی وارث نے کرایہ اور بقایاجات کی ادائیگی کے لیے نوٹس جاری کیا، لیکن کرایہ داروں نے قانونی وارثوں کو کرایہ ادا کرنے کی بجائے متوفی مالک کے نام عدالت میں جمع کروایا۔

فیصلے کے مطابق، نوٹس ملنے کے بعد کرایہ متوفی کے نام جمع کروانا قانوناً ادائیگی تصور نہیں ہوتا اور قانونی وارث کو کرایہ نہ دینا جان بوجھ کر ڈیفالٹ شمار ہوتا ہے۔ اس لیے کرایہ دار بے دخلی کے ذمہ دار ٹھہرائے گئے ہیں۔