پریس کلب لاہور کے 2026 انتخابات: جرنلسٹ گروپ کی شاندار فتح، ارشد انصاری دوبارہ صدر منتخب

لاہور(جانوڈاٹ پی کے) پریس کلب لاہور کے سالانہ انتخابات برائے 2026 کے نتائج سامنے آ گئے، جس میں جرنلسٹ گروپ نے واضح برتری حاصل کی اور تقریباً تمام اہم عہدوں پر فتح حاصل کی۔

نتائج کے مطابق، جرنلسٹ پینل کے ارشد انصاری 1283 ووٹ لے کر ایک مرتبہ پھر لاہور پریس کلب کے صدر منتخب ہو گئے، جبکہ گرینڈ الائنس کے اعظم چوہری 711 ووٹ لے سکے۔

سینئر نائب صدر کے عہدے پر جرنلسٹ پینل کے سلمان قریشی 1125 ووٹ کے ساتھ کامیاب ہوئے، جبکہ گرینڈ الائنس کی صائمہ نواز 839 ووٹ حاصل کر سکیں۔ نائب صدر کے مخصوص عہدے پر گرینڈ الائنس کی ناصرہ عتیق 1045 ووٹ لے کر منتخب ہوئیں، جبکہ جرنلسٹ پینل کے مدثر حسین تتلہ 882 ووٹ کے ساتھ دوسرے نمبر پر رہے۔

جنرل سیکرٹری کے عہدے پر ایکسپریس نیوز سے وابستہ جرنلسٹ پینل کے افضال طالب 1059 ووٹ کے ساتھ کامیاب ہوئے، ان کے مقابلے میں گرینڈ الائنس کے عبدالمجید ساجد 814 ووٹ اور آزاد امیدوار اعجاز مرزا 103 ووٹ حاصل کر سکے۔

جوائنٹ سیکرٹری کی نشست پر جرنلسٹ پینل کے عمران شیخ 1002 ووٹ لے کر منتخب ہوئے، جبکہ گرینڈ الائنس کے رانا محمد اکرام 959 ووٹ کے ساتھ دوسرے نمبر پر رہے۔ خزانچی کے عہدے پر جرنلسٹ پینل کے سالک نواز 1035 ووٹ کے ساتھ ایک بار پھر کامیاب ہوئے، جبکہ حسنین چوہری 926 ووٹ حاصل کر سکے۔

خواتین کے مخصوص نائب صدر کی نشست پر جرنلسٹ پینل کی مدیحہ الماس 986 ووٹ لے کر کامیاب ہوئیں، جبکہ گرینڈ الائنس کی ثمینہ پاشا 956 ووٹ کے ساتھ قریب ترین حریف رہیں۔

گورننگ باڈی کی 9 جنرل نشستوں میں سے 8 پر جرنلسٹ پینل کے امیدوار کامیاب ہوئے، جبکہ گرینڈ الائنس کا صرف ایک امیدوار سید بدر سعید منتخب ہو سکا۔ گورننگ باڈی کے کامیاب امیدواروں میں سید سجاد کاظمی، خواجہ سرمد فرخ، الفت حسین مغل، اسد محمود گڈو، ایم احمد رضا، کامران خان، راجہ عظمت اور ظہیر شیخ شامل ہیں۔ اقلیتی مخصوص نشست پر جرنلسٹ پینل کے آشر جان 860 ووٹ لے کر منتخب ہوئے۔

انتخابی نتائج کے اعلان کے بعد کامیاب امیدواروں کے حامیوں نے خوشی کا اظہار کیا اور نو منتخب عہدیداران نے صحافی برادری کے مسائل کے حل اور پریس کلب کے کردار کو مزید فعال بنانے کے عزم کا اظہار کیا۔