لاہور: ہوا بھرنے والی ٹینکی پھٹنے سے خاتون جاں بحق، بچی اور نوجوان زخمی

لاہور (جانوڈاٹ پی کے) پی آئی اے روڈ پر شیزان بیکری انم پلازہ کے قریب غباروں میں ہوا بھرنے والی ٹینکی پھٹنے سے افسوسناک حادثہ پیش آیا، جس میں ایک خاتون جاں بحق اور ایک بچی و ایک شخص زخمی ہو گئے۔

ریسکیو 1122 کے مطابق حادثے کی اطلاع ملتے ہی امدادی ٹیمیں فوری طور پر موقع پر پہنچ گئیں۔ دھماکے کے نتیجے میں 30 سالہ نور تاج زوجہ زویر موقع پر ہی جاں بحق ہوگئیں۔

ریسکیو حکام نے بتایا کہ حادثے میں 10 ماہ کی بچی جویریہ اور 24 سالہ انعام زخمی ہوئے، جنہیں فوری طور پر طبی امداد کے لیے جناح ہسپتال منتقل کر دیا گیا۔ زخمیوں کی حالت تشویشناک بتائی گئی ہے۔

حادثے کی وجہ اور ذمہ داری کا تعین کرنے کے لیے تحقیقات شروع کر دی گئی ہیں۔