پاک چین تعلقات مزید مضبوط، ستمبر میں چین کا دوبارہ دورہ کروں گا، محسن نقوی

لاہور (جانوڈاٹ پی کے) وفاقی وزیر داخلہ محسن نقوی نے کہا ہے کہ پاکستان اور چین کے درمیان باہمی تعلقات مسلسل فروغ پا رہے ہیں اور وہ ستمبر میں دوبارہ چین کا دورہ کریں گے۔

وفاقی وزیر داخلہ سے چین کے قونصل جنرل ژاو شیرین نے ملاقات کی، جس میں باہمی دلچسپی کے امور، پاک چین تعلقات اور دوطرفہ تعاون پر تفصیلی تبادلہ خیال کیا گیا۔ محسن نقوی نے بطور چینی قونصل جنرل ژاو شیرین کی خدمات کو خراجِ تحسین پیش کرتے ہوئے ان کے لیے نیک تمناؤں کا اظہار کیا۔

اس موقع پر چینی قونصل جنرل ژاو شیرین نے محسن نقوی کی کارکردگی کو سراہتے ہوئے کہا کہ بطور وزیر اعلیٰ پنجاب اور اب وفاقی وزیر داخلہ، انہوں نے پاک چین دوستی کو مضبوط بنانے کے لیے غیر معمولی اقدامات کیے۔ ان کا کہنا تھا کہ پاکستان میں ان کا قیام نہایت خوشگوار رہا۔

وفاقی وزیر داخلہ محسن نقوی نے کہا کہ ژاو شیرین سے ان کا تعلق بھائیوں جیسا ہے جو آئندہ بھی برقرار رہے گا، اور لاہور میں ان کی کمی ہمیشہ محسوس کی جائے گی۔

محسن نقوی نے اپنے حالیہ دورہ چین کا ذکر کرتے ہوئے بتایا کہ چینی وزیر پبلک سکیورٹی وانگ ژاو ہونگ سے ساڑھے تین گھنٹے طویل ملاقات نہایت خوشگوار اور سودمند رہی، جس میں مشترکہ مفادات کے شعبوں میں تعاون بڑھانے پر اتفاق ہوا۔

انہوں نے مزید کہا کہ ستمبر میں دوبارہ چین کا دورہ کروں گا اور اپنے بھائی سے ملاقات کروں گا۔

ملاقات کے اختتام پر وفاقی وزیر داخلہ محسن نقوی نے چینی قونصل جنرل ژاو شیرین کو کھلاڑیوں کے دستخط شدہ بیٹ کا تحفہ دیا، جبکہ ژاو شیرین نے محسن نقوی کو چینی صدر شی جن پنگ کی کتاب بطور تحفہ پیش کی۔