چلتی ٹرین میں خاتون مسافر سے بدسلوکی، سپیشل ٹکٹ ایگزامینر معطل

لاہور (جانوڈاٹ پی کے) پاکستان ریلوے نے چلتی ٹرین میں خاتون مسافر کو تھپڑ مارنے اور مسافروں سے لڑائی جھگڑا کرنے کے واقعے پر سپیشل ٹکٹ ایگزامینر ارشاد کو معطل کر دیا ہے جبکہ واقعے کی باقاعدہ انکوائری بھی شروع کر دی گئی ہے۔

ڈویژنل کمرشل آفیسر عبداللہ ارشد کے مطابق واقعے کا نوٹس لیتے ہوئے سپیشل ٹکٹ ایگزامینر کو فوری طور پر معطل کیا گیا ہے اور حقائق جاننے کے لیے محکمانہ انکوائری جاری ہے۔

ریلوے ذرائع کا کہنا ہے کہ فیصل آباد سے راولپنڈی جانے والی پاکستان ایکسپریس ٹرین میں سامان راستے میں رکھنے کے معاملے پر تلخ کلامی شروع ہوئی، جو بعد ازاں لڑائی جھگڑے میں تبدیل ہو گئی۔ مسافروں کی جانب سے ویڈیو بنانے پر صورتحال مزید کشیدہ ہو گئی اور نوبت ہاتھا پائی تک جا پہنچی، جس کے باعث ٹرین کچھ دیر کے لیے رکی بھی رہی۔

ذرائع کے مطابق دیگر مسافروں نے مداخلت کر کے لڑائی ختم کروائی، جبکہ واقعے پر مسافروں کی شکایات موصول ہونے کے بعد ریلوے حکام نے کارروائی کا آغاز کر دیا ہے۔

ریلوے انتظامیہ کے مطابق پیر کے روز انکوائری کمیٹی کے سامنے سپیشل ٹکٹ ایگزامینر، ڈیوٹی پر موجود پولیس اہلکار اور ٹرین گارڈ پیش ہوں گے۔ واضح رہے کہ یہ واقعہ 4 سے 5 روز قبل پیش آیا تھا۔