روہڑی میں جے یو آئی کی امن بحال کرو تحریک کے سلسلے میں احتجاجی ریلی، پریا کماری کی جلد بازیابی کامطالبہ
روہڑی (جانوڈاٹ پی کے) جمعیت علماء اسلام ضلع سکھر کے زیرِ اہتمام امن بحال کرو تحریک کے سلسلے میں روہڑی کے نواحی علاقے سنگرار میں احتجاجی ریلی نکالی جو بعد ازاں بڑے احتجاجی جلسے کی صورت اختیار کر گئ جمعیت علماء اسلام صوبہ سندھ کے قائم مقام سیکریٹری جنرل و ضلع سکھر کے امیر مولانا محمد صالح انڈھڑ نے کہا کہ ضلع سکھر میں امن و امان کی بگڑتی ہوئی صورتحال پر دو ٹوک مؤقف اختیار کرتے ہوئے کہا کہ معصوم بچی پریا کماری کو کافی عرصہ گزرنے کے باوجود بازیاب نہ کرانا حکومتِ وقت، پولیس اور متعلقہ اداروں کی سنگین نااہلی اور ناقابلِ قبول غفلت کا ثبوت ہے۔انہوں نے واضح کیا کہ ایک مہذب اور ذمہ دار ریاست میں بچوں کا یوں لاپتہ ہو جانا اور مجرموں کا بے نقاب نہ ہونا حکومتی رِٹ پر سوالیہ نشان ہے، جسے کسی صورت برداشت نہیں کیا جا سکتا۔انہوں نے کہا کہ امن و امان کے قیام کے دعوے محض کاغذی ثابت ہو رہے ہیں، جبکہ عوام بالخصوص خواتین اور بچے عدم تحفظ کا شکار ہیں۔ اگر ریاست شہریوں کی جان و مال اور معصوم بچوں کے تحفظ میں ناکام ہو جائے تو یہ حکمرانی کے نظام کی کھلی ناکامی تصور کی جاتی ہے۔مولانا محمد صالح انڈھڑ نے مطالبہ کیا کہ معصوم پریا کماری کی فوری بازیابی یقینی بنائی جائے، مجرموں کو بے نقاب کر کے قرار واقعی سزا دی جائے اور امن و امان کی بحالی کے لیے ہنگامی بنیادوں پر عملی اقدامات کیے جائیں، بصورتِ دیگر عوامی احتجاج کا دائرہ مزید وسیع کیا جائے گا۔احتجاجی مظاہرے میں حافظ عبدالحمید مھر، قاری عبدالغفار سومرو، حاجی میردین کٹپر، مفتی عبدالماجد منگریو، قاری مطیع اللہ جسکانی سمیت جے یو آئی اور قوم پرست جماعتوں کے عہدیدران و کارکنان عوام کی کثیر تعداد نے بھی مظاہرے میں شرکت کی ۔
