سانحہ گل پلازہ: تحقیقات کیلئے ٹیکنیکل و تحقیقاتی ٹیم جائے وقوعہ پر پہنچ گئی

کراچی (جانوڈاٹ پی کے)سانحہ گل پلازہ کی تحقیقات کے لیے ٹیکنیکل اور تحقیقاتی ٹیم جائے وقوعہ پر پہنچ گئی ہے، جہاں ٹیم نے ڈپٹی کمشنر جنوبی کے ہمراہ عمارت کے مختلف حصوں کا تفصیلی جائزہ لیا۔

تحقیقاتی ٹیم نے گل پلازہ کے گراؤنڈ فلور کا معائنہ کیا اور عمارت کے اندرونی حصوں کی موجودہ صورتحال کا جائزہ لیا۔ کمیٹی کے ارکان نے آتشزدگی سے متاثرہ سامان اور دکانوں کا بھی مشاہدہ کیا تاکہ آگ لگنے کی وجوہات اور نقصانات کا درست اندازہ لگایا جا سکے۔

دریں اثنا ریسکیو 1122 کے کمانڈر حمیر واحد نے میڈیا سے گفتگو کرتے ہوئے بتایا کہ گزشتہ پوری رات سرچ آپریشن جاری رہا تاہم کوئی نئی لاش برآمد نہیں ہو سکی۔ انہوں نے کہا کہ عمارت کے منہدم ہونے والے حصے اور بیسمنٹ تک رسائی اب بھی مشکل ہے، جس کے باعث ریسکیو آپریشن میں احتیاط برتی جا رہی ہے۔

کمانڈر ریسکیو 1122 کے مطابق سرچ آپریشن کی تکمیل کے حتمی وقت کا تعین کرنا قبل از وقت ہے۔ انہوں نے بتایا کہ جن حصوں میں سرچنگ مکمل کی جا چکی ہے وہاں اب مزید لاشیں یا انسانی اعضاء موجود نہیں، جبکہ سرچ کے دوران ملنے والی رقم اور قیمتی اشیاء انتظامیہ کے حوالے کی جا رہی ہیں۔