چترال میں برفانی تودہ گرنے سے ایک ہی خاندان کے 9 افراد جاں بحق

پشاور (جانوڈاٹ پی کے) چترال کے علاقے سریگال دمیل ارندو میں برفانی تودہ گرنے کا افسوسناک واقعہ پیش آیا، جس کے نتیجے میں ایک ہی خاندان کے 9 افراد جاں بحق ہو گئے۔

ڈپٹی کمشنر چترال راؤ ہاشم کے مطابق برفانی تودہ گرنے سے ایک ہی خاندان کے 10 افراد ملبے تلے دب گئے تھے۔ ریسکیو ٹیموں نے کارروائی کرتے ہوئے 9 افراد کی لاشیں ملبے سے نکال لیں، جبکہ ایک بچے کو زندہ حالت میں ملبے تلے سے نکال لیا گیا۔

ڈپٹی کمشنر کے مطابق جاں بحق افراد کی لاشیں ضروری کارروائی کے بعد چترال وارڈاپ دروش منتقل کر دی گئی ہیں۔ واقعے کے بعد علاقے میں سوگ کی فضا قائم ہے۔

دوسری جانب ضلع خیبر کی وادی تیراہ میں حالیہ شدید برفباری کے باعث پھنس جانے والے آئی ڈی پیز کو محفوظ مقامات پر منتقل کرنے کے لیے ریسکیو آپریشن تاحال جاری ہے۔