ٹرمپ کے بورڈ آف پیس میں پاکستان کی شمولیت ناقابل قبول، امیر جماعت اسلامی

لاہور(جانوڈاٹ پی کے)امیر جماعت اسلامی حافظ نعیم الرحمان نے امریکی صدر ڈونلڈ ٹرمپ کے مجوزہ بورڈ آف پیس میں پاکستان کی شمولیت کے حکومتی فیصلے کو سختی سے مسترد کرتے ہوئے اسے نوآبادیاتی نظام کی نئی شکل قرار دے دیا ہے۔

سماجی رابطے کی ویب سائٹ ایکس  پر جاری اپنے بیان میں حافظ نعیم الرحمان کا کہنا تھا کہ ٹرمپ کا بورڈ آف پیس درحقیقت عالمی طاقتوں کے مفادات کے تحفظ کا ایک نیا فورم ہے، جس میں عراق کی تباہی کے ذمہ دار ٹونی بلیئر جیسے افراد کی شمولیت اس کی ساکھ پر سنگین سوالات کھڑے کرتی ہے۔

انہوں نے کہا کہ بورڈ آف پیس فلسطینیوں کے وسائل اور زمینوں پر قبضے کا ایک نیا طریقہ ہے، جبکہ تعمیرِ نو کے نام پر غزہ پر امریکی قبضہ کسی صورت قابل قبول نہیں۔ ان کا کہنا تھا کہ پاکستانی وزارت خارجہ کی جانب سے یہ دعویٰ کہ پاکستان نے سلامتی کونسل کی قرارداد کے تحت غزہ امن منصوبے کی حمایت کی، حقائق کے منافی ہے۔

حافظ نعیم الرحمان نے مزید کہا کہ خود ڈونلڈ ٹرمپ یہ مؤقف اختیار کر چکا ہے کہ اس کا بورڈ آف پیس مستقبل میں اقوام متحدہ کی جگہ لے سکتا ہے، ایسے میں پاکستان کی اس بورڈ میں شمولیت کا کوئی اخلاقی، سیاسی یا سفارتی جواز نہیں بنتا۔

انہوں نے واضح اور دوٹوک انداز میں کہا کہ پاکستان کی فوج کسی صورت غزہ نہیں جانی چاہیے اور پاکستان کو کسی بھی ایسے عالمی منصوبے کا حصہ نہیں بننا چاہیے جو مظلوم اقوام کے خلاف ہو۔