چار سال بعد پاکستان کی عالمی بانڈ مارکیٹ میں واپسی کی تیاری

اسلام آباد / ڈیووس (جانوڈاٹ پی کے) پاکستان نے چار سال کے وقفے کے بعد ایک مرتبہ پھر عالمی بانڈ مارکیٹ میں واپسی کی تیاری شروع کر دی ہے۔ وفاقی وزیرِ خزانہ محمد اورنگزیب نے ورلڈ اکنامک فورم ڈیووس کے موقع پر غیر ملکی خبر رساں ادارے بلومبرگ کو بتایا کہ حکومت آئندہ چند ہفتوں میں بانڈ اجرا کے لیے عالمی مالیاتی مشیروں کی تقرری کا عمل شروع کرے گی۔

وزیر خزانہ کے مطابق حکومت اس بات کا جائزہ لے رہی ہے کہ ڈالر بانڈ، یورو بانڈ یا اسلامی مالیاتی آلہ سکوک میں سے کون سا آپشن ملک کے لیے زیادہ موزوں رہے گا۔ اس کے ساتھ ساتھ پاکستان پہلی مرتبہ چینی کرنسی میں “پانڈا بانڈ” جاری کرنے کی تیاری بھی کر رہا ہے، جس کا مقصد چینی سرمایہ مارکیٹ تک براہِ راست رسائی حاصل کرنا ہے۔

محمد اورنگزیب نے کہا کہ افراطِ زر، جو ایک وقت میں تقریباً 40 فیصد تک پہنچ چکی تھی، اب سنگل ڈیجٹ میں آ چکی ہے، جبکہ عالمی ریٹنگ ایجنسیوں موڈیز، ایس اینڈ پی اور فچ نے پاکستان کی کریڈٹ ریٹنگ میں بہتری کی ہے۔ انہوں نے مزید بتایا کہ رواں مالی سال کے اختتام تک زرِ مبادلہ کے ذخائر درآمدات کے کم از کم تین ماہ کے برابر ہونے کی توقع ہے۔

بلومبرگ کے مطابق پاکستان 2022 کے بعد عالمی بانڈ مارکیٹ سے باہر تھا، تاہم آئی ایم ایف پروگرام کے تحت مالیاتی نظم و ضبط، ٹیکس اصلاحات اور سبسڈی میں کمی سے سرمایہ کاروں کا اعتماد بحال ہوا ہے۔ معاشی ماہرین کا کہنا ہے کہ عالمی بانڈ مارکیٹ میں واپسی پاکستان کے مالی استحکام کی جانب ایک اہم قدم ہے، جبکہ پانڈا بانڈ کا اجرا چین سے سرمایہ کاری بڑھانے میں مددگار ثابت ہوگا۔