’ایک غلط کلک جیل تک لے جا سکتا ہے‘ این سی سی آئی اے کی سوشل میڈیا صارفین کیلئے سخت وارننگ

اسلام آباد(جانوڈاٹ پی کے) نیشنل سائبر کرائم انویسٹی گیشن ایجنسی (این سی سی آئی اے) نے سوشل میڈیا صارفین کو خبردار کرتے ہوئے کہا ہے کہ ایک غلط کلک یا غیر محتاط پوسٹ شہریوں کو جیل تک پہنچا سکتی ہے۔

این سی سی آئی اے کی جانب سے عوامی آگاہی کے لیے جاری کی گئی اہم ایڈوائزری میں کہا گیا ہے کہ صارفین کسی بھی پوسٹ، خبر یا لنک کو شیئر کرنے سے قبل اس کی تصدیق لازمی کریں، کیونکہ بغیر تحقیق اور غیر مصدقہ مواد پھیلانا قانون کی خلاف ورزی کے زمرے میں آتا ہے۔

ایجنسی نے واضح کیا ہے کہ اعلیٰ عدلیہ اور مقتدر اداروں کے خلاف غیر مصدقہ معلومات، جھوٹی خبریں یا گمراہ کن مواد پھیلانا ایک سنگین قانونی جرم ہے، جس پر سخت کارروائی عمل میں لائی جا سکتی ہے۔

این سی سی آئی اے کے مطابق شہری ذمہ دارانہ سوشل میڈیا استعمال کو یقینی بنائیں تاکہ قانونی پیچیدگیوں سے بچا جا سکے۔