شہباز شریف اور مریم نواز کے خلاف نیب کی درخواستیں غیر مؤثر قرار

لاہور(جانوڈاٹ پی کے) لاہور ہائیکورٹ نے وزیراعظم شہباز شریف اور وزیراعلیٰ پنجاب مریم نواز کے خلاف قومی احتساب بیورو (نیب) کی درخواستیں غیر مؤثر ہونے پر نمٹا دیں۔

لاہور ہائیکورٹ کے جسٹس امجد رفیق کی سربراہی میں دو رکنی بینچ نے نیب کی درخواستوں پر سماعت کی۔ سماعت کے دوران نیب کے سینئر پراسیکیوٹر وارث علی جنجوعہ نے عدالت کو آگاہ کیا کہ وزیراعظم شہباز شریف 2023 میں آشیانہ ریفرنس اور رمضان شوگر ملز ریفرنس سے بری ہو چکے ہیں، اس لیے ان کے خلاف دائر نیب کی درخواست غیر مؤثر ہو چکی ہے۔

عدالت نے دلائل سننے کے بعد نیب کی درخواست غیر مؤثر قرار دیتے ہوئے نمٹا دی۔

اسی طرح جسٹس امجد رفیق کی سربراہی میں دو رکنی بینچ نے چیئرمین نیب کی جانب سے مریم نواز کے خلاف دائر درخواست پر بھی سماعت کی۔ نیب پراسیکیوٹر نے مؤقف اختیار کیا کہ مریم نواز نیب کے کیس میں بری ہو چکی ہیں، لہٰذا درخواست غیر مؤثر قرار دی جائے۔

عدالت نے نیب کی استدعا منظور کرتے ہوئے مریم نواز کے خلاف درخواست بھی غیر مؤثر ہونے پر نمٹا دی۔

واضح رہے کہ لاہور ہائیکورٹ نے چوہدری شوگر ملز کیس میں مریم نواز کی ضمانت منظور کرتے ہوئے ان کی رہائی کا حکم دیا تھا، جبکہ نیب نے مارچ 2021 میں ان کی ضمانت منسوخی کے لیے عدالت سے رجوع کیا تھا۔