سپریم کورٹ میں وکلا کی غیر حاضری پر چیف جسٹس سخت برہم ، صدر بار طلب

اسلام آباد(جانوڈاٹ پی کے) سپریم کورٹ میں وکلا کی مسلسل عدم پیشی کے باعث چیف جسٹس یحییٰ آفریدی نے سخت ردعمل کا اظہار کرتے ہوئے صدر سپریم کورٹ بار ہارون الرشید کو طلب کر لیا۔

عدالت میں وکلا کی غیر حاضری پر چیف جسٹس نے برہمی کا اظہار کیا اور ویڈیو لنک کی سہولت کے باوجود کیسز ملتوی کرنے کی درخواستوں پر تشویش کا اظہار کیا۔

چیف جسٹس نے کہا کہ ایک طرف جلد سماعت کی درخواستیں دائر کی جاتی ہیں، مگر دوسری طرف وکلا عدالت میں پیش نہیں ہوتے، حالانکہ ویڈیو لنک کی سہولت دستیاب ہے۔ جسٹس شاہد بلال نے بتایا کہ وکلا کی جانب سے کیسز ملتوی کرنے کی درخواستیں غیر معمولی حد تک بڑھ گئی ہیں۔

چیف جسٹس نے ہدایت کی کہ بار کے ذریعے وکلا کو پابند بنایا جائے تاکہ عدالت میں حاضری یقینی بنائی جا سکے۔ صدر سپریم کورٹ بار ہارون الرشید نے کہا کہ پیش نہ ہونے والے وکلا پر جرمانہ کیا جائے، جس پر چیف جسٹس نے سختی سے کہا کہ پہلی بار جرمانہ نہیں کیا جائے گا، لیکن وکلا کو پابند کرنا ضروری ہے تاکہ عدالت کے نظام کو نقصان نہ پہنچے۔

چیف جسٹس نے واضح کیا کہ وکلا کی غیر حاضری سماعت کے عمل اور عدالتی کارروائی کو متاثر کر رہی ہے، اس لیے سخت اقدامات کی ضرورت ہے۔