اسلام آباد ہائیکورٹ کے مستقل ہونے والے تینوں ججوں نے حلف اٹھا لیا
اسلام آباد(جانوڈاٹ پی کے) اسلام آباد ہائی کورٹ کے تین ججز جسٹس محمد آصف، جسٹس محمد اعظم خان اور جسٹس انعام امین منہاس نے مستقل عہدے کے لیے حلف اٹھا لیا۔
تقریب میں چیف جسٹس اسلام آباد ہائی کورٹ سردار محمد سرفراز ڈوگر نے تینوں ججز سے حلف لیا۔ تقریب کا آغاز تلاوتِ کلام پاک سے ہوا، جس کے بعد قومی ترانے کی دھن بجائی گئی۔ رجسٹرار اسلام آباد ہائی کورٹ نے ججز کی تعیناتی کا نوٹیفکیشن بھی پڑھ کر سنایا۔
وزیر قانون اعظم نذیر تارڑ، ہائی کورٹ اور ڈسٹرکٹ کورٹ کے ججز، اسلام آباد ہائی کورٹ بار کے صدر واجد گیلانی اور سیکرٹری منظور ججہ بھی تقریب میں موجود تھے۔
وزارت قانون کی جانب سے صدر مملکت کی منظوری کے بعد تینوں ججز کی مستقل تعیناتی کا نوٹیفکیشن جاری کیا گیا تھا۔ تینوں ججز نے مستقل عہدے سے قبل ایک سال تک بطور ایڈہاک جج خدمات انجام دیں۔
