گل پلازہ کے شہید فائر فائٹر کو سول ایوارڈ دیا جائے، صدر مملکت کی ہدایت

کراچی (جانوڈاٹ پی کے) صدرِ مملکت آصف علی زرداری نے وزیراعلیٰ سندھ مراد علی شاہ کو گل پلازہ میں جاری ریسکیو اور فائرفائٹنگ آپریشن میں تمام دستیاب وسائل بروئے کار لانے کی ہدایت کر دی ہے۔

وزیراعلیٰ سندھ سے ٹیلی فونک گفتگو کے دوران صدرِ مملکت نے گل پلازہ میں لگنے والی آگ کی صورتحال دریافت کی اور آتشزدگی کے دوران شہید ہونے والے فائر فائٹر فرقان شوکت کی بہادری اور فرض شناسی کو سراہا۔ آصف علی زرداری نے ہدایت کی کہ شہید فائر فائٹر فرقان شوکت کو سول ایوارڈ کے لیے نامزد کیا جائے۔

صدرِ مملکت نے زور دیا کہ زخمیوں کو بہترین طبی سہولیات فراہم کی جائیں اور متاثرین کے لیے فوری امدادی اقدامات کیے جائیں۔ انہوں نے فائر سیفٹی قوانین کے مؤثر نفاذ پر بھی زور دیتے ہوئے کہا کہ تجارتی اور رہائشی عمارتوں میں حفاظتی معائنوں کے نظام کو جدید خطوط پر استوار کیا جائے۔

آصف علی زرداری کا کہنا تھا کہ ایسے ٹھوس اقدامات کیے جائیں جن سے مستقبل میں اس نوعیت کے سانحات کی روک تھام ممکن ہو سکے۔