گل پلازہ آگ: متعدد افراد لاپتہ، اہلِ خانہ ہسپتالوں میں پریشان

کراچی(جانوڈاٹ پی کے) شہر قائد کے علاقے ایم اے جناح روڈ پر گل پلازہ میں لگنے والی آگ کے بعد متعدد افراد تاحال لاپتہ ہیں، جس کے باعث ان کے اہلِ خانہ شدید پریشانی کا شکار ہیں۔

لاپتہ افراد کے اہلخانہ مختلف ہسپتالوں میں اپنے پیاروں کی تلاش میں مصروف ہیں۔ متاثرین کے اہلخانہ کا کہنا ہے کہ اپنے رشتہ داروں سے گزشتہ رات تک رابطہ تھا، تاہم اب ان کے فون بند ہیں۔ ایک بزرگ شہری نے بتایا کہ پلازے میں میرے 2 بیٹے اور ایک بھتیجا کام کرتے ہیں، جن سے تاحال رابطہ نہیں ہو سکا۔

دوسری جانب سول ہسپتال کے برن سینٹر کے باہر متاثرہ افراد کے اہلخانہ کی بڑی تعداد موجود ہے، اور خدشہ ظاہر کیا جا رہا ہے کہ کئی افراد اب بھی عمارت کے اندر پھنسے ہوئے ہیں۔

یاد رہے کہ گزشتہ رات گل پلازہ میں لگی آگ پر تاحال قابو نہیں پایا جا سکا۔ اس حادثے میں ایک فائر فائٹر سمیت 6 افراد جاں بحق اور 30 سے زائد زخمی ہوئے، جبکہ عمارت کے تین حصے زمین بوس ہو چکے ہیں۔ ریسکیو آپریشن میں سندھ رینجرز، پاک بحریہ اور دیگر متعلقہ ادارے حصہ لے رہے ہیں۔

متاثرہ تاجروں اور شہریوں نے آگ پر قابو پانے میں تاخیر پر غم و غصے کا اظہار کرتے ہوئے فائر بریگیڈ کی کارکردگی پر عدم اطمینان کا بھی اظہار کیا ہے۔