پنجاب میں سستی اشیائے خورونوش کی فری ہوم ڈیلیوری، 35 شہروں میں تین لاکھ سے زائد آرڈرز مکمل

لاہور (جانوڈاٹ پی کے) پنجاب میں سرکاری سطح پر معیاری اور سستی اشیائے خورونوش کی فراہمی کے پہلے فری ہوم ڈیلیوری پراجیکٹ کے تحت صوبے کے 35 شہروں میں قائم 46 سہولت بازاروں سے عوام کو گھر کی دہلیز پر اشیاء فراہم کی جا رہی ہیں۔

پنجاب سہولت بازار اتھارٹی (PSBA) کے مطابق فری ہوم ڈیلیوری پراجیکٹ کے تحت اب تک 3 لاکھ 12 ہزار سے زائد آرڈرز کی کامیاب ڈیلیوری مکمل کی جا چکی ہے۔ اس منصوبے کے ذریعے 13 بنیادی اشیائے خورونوش عوام کو مقررہ نرخوں سے بھی کم قیمت پر فراہم کی جا رہی ہیں۔

پی ایس بی اے کے مطابق فری ہوم ڈیلیوری کے لیے 13 بنیادی اشیائے خورونوش کے نرخ ڈپٹی کمشنر (ڈی سی) کے نوٹیفائیڈ ریٹس سے 7 فیصد تک کم مقرر کیے گئے ہیں، جس کے باعث شہریوں کو نمایاں ریلیف حاصل ہو رہا ہے۔

عوام گوگل پلے اسٹور اور ایپل ایپ اسٹور پر دستیاب فری ہوم ڈیلیوری ایپ کے ذریعے باآسانی آرڈر کر سکتے ہیں، جبکہ پنجاب سہولت بازار اتھارٹی کے رائیڈر آرڈرز بروقت اور بلا معاوضہ صارفین کے گھروں تک پہنچا رہے ہیں۔ ایپ کے استعمال پر صارفین کو ڈیلیوری چارجز سے مکمل استثنا کے ساتھ 7 فیصد تک اضافی بچت بھی حاصل ہو رہی ہے۔

فری ہوم ڈیلیوری سروس کے تحت آلو، پیاز، ٹماٹر، کدو، لہسن، سیب، کیلا، کھجور، لیموں، امرود اور تربوز کے علاوہ دال چنا، بیسن، آٹا اور چینی بھی آرڈر کی جا سکتی ہے۔

سی ایم فری ہوم ڈیلیوری پراجیکٹ کے ذریعے اب تک شہریوں کو 110 ملین روپے سے زائد کی بچت ہو چکی ہے۔ شہریوں نے اس منصوبے کو سراہتے ہوئے کہا ہے کہ سستی اور معیاری اشیائے خورونوش کی گھر کی دہلیز پر فراہمی ایک مثالی اقدام ہے۔

وزیراعلیٰ پنجاب مریم نواز شریف کا کہنا ہے کہ حکومت کسی صورت مہنگائی کے اثرات عوام تک منتقل نہیں ہونے دے گی۔ انہوں نے کہا کہ فری ہوم ڈیلیوری پراجیکٹ کا دائرہ کار مرحلہ وار پنجاب کے دیگر شہروں تک بھی بڑھایا جائے گا۔