خیرپور ٹامیوالی: قبر کھود کر لاش کی بے حرمتی کرنے والا ملزم مقابلے میں ہلاک

خیرپور ٹامیوالی(جانوڈاٹ پی کے) پنجاب کے ضلع بہاولپور کی تحصیل خیرپور ٹامیوالی میں پولیس نے دعویٰ کیا ہے کہ ایک نوجوان لڑکی کی قبر کھود کر اس کی لاش کی بے حرمتی کرنے والا ملزم مقابلے کے دوران اپنے ہی ساتھیوں کی فائرنگ سے ہلاک ہو گیا۔

پولیس ترجمان کے مطابق بستی سرداراں کا رہائشی ملزم عبدالواحد عرف کالا اپنے تین ساتھیوں کے ہمراہ گرفتاری کے خوف سے حمید آباد کے علاقے میں چھپا ہوا تھا۔ رات گئے پولیس پارٹی نے چھاپہ مارا، جس پر ملزمان نے مبینہ طور پر فائرنگ کی۔

ترجمان نے بتایا کہ مقابلے کے دوران ملزم شدید زخمی حالت میں پایا گیا، جبکہ اس کے ساتھی موقع سے فرار ہو گئے۔ فائرنگ کے تبادلے میں ہیڈ کانسٹیبل علی رضا کو گولی لگی، تاہم بلٹ پروف جیکٹ کی وجہ سے وہ محفوظ رہے۔

ریسکیو 1122 کی ٹیم نے زخمی ملزم کو فوری طبی امداد فراہم کی، مگر وہ زخموں کی تاب نہ لاتے ہوئے چل بسا۔ پولیس نے فرار ملزمان کے خلاف ایف آئی آر نمبر 9/26 درج کر کے ان کی تلاش شروع کر دی ہے۔

پولیس کے مطابق اتوار کی شام 16 سالہ لڑکی کی تدفین ہوئی تھی، مگر پیر کی صبح قبر سے لاش غائب پائی گئی۔ لڑکی کی لاش کو مبینہ طور پر بے حرمتی کے بعد قریبی کھیتوں میں پھینک دیا گیا تھا۔

ترجمان نے بتایا کہ پولیس لڑکی کے اہل خانہ اور علاقے کے دیگر افراد سے بھی تفتیش کر رہی ہے، جبکہ فرانزک رپورٹ آنے کے بعد واضح ہو گا کہ لڑکی کی موت کرنٹ لگنے سے ہوئی یا اسے قتل کیا گیا۔ مزید کارروائی فرانزک رپورٹ کے بعد کی جائے گی۔