صدر مملکت آصف علی زرداری چار روزہ سرکاری دورے پر بحرین پہنچ گئے
منامہ (جانوڈاٹ پی کے) صدر مملکت آصف علی زرداری چار روزہ سرکاری دورے پر بحرین کے دارالحکومت منامہ پہنچ گئے۔
بحرین پہنچنے پر صدر مملکت کا بحرین نیشنل گارڈ کے کمانڈر شیخ محمد بن عیسیٰ الخلیفہ اور بحرین کے وزیر خارجہ نے پرتپاک استقبال کیا۔ دورے کے دوران صدر آصف علی زرداری کی بحرین کے فرمانروا شاہ حمد بن عیسیٰ الخلیفہ اور ولی عہد و وزیر اعظم شہزادہ سلمان بن حمد الخلیفہ سے اہم ملاقاتیں متوقع ہیں۔
ذرائع کے مطابق ملاقاتوں میں دوطرفہ تعلقات، اقتصادی تعاون، سرمایہ کاری، علاقائی صورتحال اور باہمی دلچسپی کے امور پر تبادلہ خیال کیا جائے گا۔
صدر مملکت اپنے دورۂ بحرین کے دوران منامہ میں واقع اکنامک ڈویلپمنٹ بورڈ کے صدر دفتر میں منعقدہ استقبالیہ تقریب سے بھی خطاب کریں گے، جہاں وہ پاکستان میں سرمایہ کاری کے مواقع پر روشنی ڈالیں گے۔
