شدید دھند: پنجاب میں موٹرویز اور اہم شاہراہیں بند، حدِ نگاہ صفر سے 100 میٹر تک محدود

لاہور (جانوڈاٹ پی کے) پنجاب کے مختلف علاقوں میں شدید دھند کے باعث حدِ نگاہ شدید متاثر ہونے پر موٹرویز اور اہم شاہراہوں کو ٹریفک کے لیے بند کر دیا گیا ہے۔

ترجمان موٹروے پولیس سینٹرل ریجن کے مطابق شہریوں کی جان و مال کے تحفظ کے پیش نظر مختلف مقامات پر موٹرویز پر ٹریفک کی آمدورفت معطل کی گئی ہے۔ موٹروے ایم ٹو (M-2) لاہور سے کوٹ مومن تک شدید دھند کے باعث بند کر دی گئی ہے۔

اسی طرح موٹروے ایم تھری (M-3) فیض پور سے درخانہ، ایم فور (M-4) پنڈی بھٹیاں سے ملتان اور ایم فائیو (M-5) ملتان سے ظاہر پیر تک دھند کے باعث ٹریفک کے لیے بند ہیں۔ علاوہ ازیں موٹروے ایم الیون (M-11) لاہور سے سمبڑیال اور لاہور ایسٹرن بائی پاس بھی شدید دھند کے باعث بند کر دیے گئے ہیں۔

موٹروے پولیس کے مطابق قومی شاہراہ پر لاہور، مانگا منڈی، پتوکی، اوکاڑہ، ساہیوال، کسوال اور اقبال نگر میں شدید دھند چھائی ہوئی ہے، جبکہ میاں چنوں، خانیوال، ملتان، لودھراں اور بہاولپور کے علاقوں میں بھی حدِ نگاہ انتہائی کم ریکارڈ کی گئی ہے۔ بعض مقامات پر حدِ نگاہ صفر سے 100 میٹر تک محدود ہو چکی ہے، جو ڈرائیونگ کے لیے نہایت خطرناک صورتحال ہے۔

ترجمان نے خبردار کیا کہ دھند کے دوران تیز رفتاری اور لین کی خلاف ورزی جان لیوا حادثات کا سبب بن سکتی ہے۔ انہوں نے شہریوں کو ہدایت کی کہ غیر ضروری سفر سے گریز کریں، لین ڈسپلن پر سختی سے عمل کریں اور دن کے اوقات میں سفر کو ترجیح دیں۔

انہوں نے مزید بتایا کہ دھند کے دوران محفوظ سفری اوقات صبح 10 بجے سے شام 6 بجے تک ہیں۔ ڈرائیور حضرات فوگ لائٹس کا لازمی استعمال کریں، آگے چلنے والی گاڑی سے مناسب فاصلہ رکھیں اور رفتار کم رکھیں۔ کسی بھی قسم کی رہنمائی یا مدد کے لیے شہری موٹروے پولیس کی ہیلپ لائن 130 پر رابطہ کر سکتے ہیں۔