پاکستان بار کونسل انتخابات: احسن بھون گروپ کی بڑی کامیابی

لاہور(جانوڈاٹ پی کے) پاکستان بار کونسل کے دو اہم عہدوں کے لیے منعقدہ انتخابات میں احسن بھون گروپ نے دوبارہ بڑی کامیابی حاصل کر لی۔ پیر مسعود چشتی 15 ووٹ لے کر پاکستان بار کونسل کے وائس چیئرمین منتخب ہوئے، جبکہ حامد خان گروپ کے قاضی ارشد صرف 8 ووٹ حاصل کر سکے۔

چیئرمین ایگزیکٹو کمیٹی کے لیے بھی احسن بھون گروپ کے منیر ملک بلا مقابلہ منتخب ہوئے، جس سے گروپ کی مجموعی کامیابی واضح ہو گئی۔

پاکستان بار کونسل کے انتخابات میں کل 23 ممبران نے شرکت کی، اور اٹارنی جنرل نے الیکشن کمیشن کے فرائض سر انجام دیے۔ وفاقی وزیر قانون اعظم نذیر تارڑ سمیت احسن بھون کے رہنما طاہر نصراللہ وڑائچ، عامر سعید اور دیگر ممبران نے ووٹ کاسٹ کیے۔

یہ انتخابات ایک سال کی مدت کے لیے وائس چیئرمین اور چیئرمین ایگزیکٹو کمیٹی کے عہدوں کے لیے منعقد ہوئے، جس میں احسن بھون گروپ کی حکمت عملی اور مقبولیت کامیابی کی بنیادی وجہ قرار دی جا رہی ہے۔