26 نومبر احتجاج کیس: علیمہ خان کی حاضری معافی کی درخواست پر پراسیکیوٹر کی سخت مخالفت، عدالت نے فیصلہ محفوظ کر لیا

راولپنڈی (جانوڈاٹ پی کے)انسداد دہشت گردی عدالت میں 26 نومبر 2024 احتجاج کیس کی سماعت کے دوران ملزمہ علیمہ خان کی حاضری معافی کی درخواست پر پراسیکیوٹر نے سخت مخالفت کی اور عدالت سے وارنٹ گرفتاری جاری کرنے کی استدعا کی، تاہم عدالت نے دلائل سننے کے بعد فیصلہ محفوظ کر لیا۔

انسداد دہشت گردی عدالت کے جج امجد علی شاہ نے کیس کی سماعت کی، جس میں علیمہ خان سمیت تمام 11 ملزمان کو طلب کیا گیا تھا۔

علیمہ خان کی جانب سے دائر درخواست میں موقف اپنایا گیا کہ وہ آج عدالت پیش نہیں ہو سکتی اور آئندہ مقررہ تاریخ پر پیش ہوں گی۔ وکیل صفائی نے عدالت کو یقین دلایا کہ آئندہ تمام سماعتوں میں قانونی طور پر شریک ہوں گے۔

پراسیکیوٹر ظہیر شاہ نے دلائل میں کہا کہ یہ درخواست تاخیری حربہ ہے کیونکہ اس مقدمے کی 20 پیشیاں پہلے ہی ہو چکی ہیں۔ انہوں نے عدالت سے استدعا کی کہ علیمہ خان سمیت غیر حاضر ملزمان کے وارنٹ گرفتاری جاری کیے جائیں تاکہ گواہان پر جرح شروع کی جا سکے۔

عدالت نے فریقین کے وکلاء کے دلائل سننے کے بعد سماعت مکمل کی اور تھوڑی دیر کے لیے وقفہ دیا۔ وکیل صفائی کی جانب سے نئی تاریخ پر پیش ہونے کی درخواست کے باوجود پراسیکیوٹر نے وارنٹ گرفتاری اور گواہان پر جرح جاری رکھنے کی استدعا دہرائی۔

واضح رہے کہ یہ مقدمہ تھانہ صادق آباد پولیس کی جانب سے درج کیا گیا تھا اور کیس اب حتمی مراحل میں ہے۔