خیبرپختونخوا:سکیورٹی فورسز کی بڑی کامیابی، دو کارروائیوں میں بھارتی حمایت یافتہ11 خوارج ہلاک
راولپنڈی (جانوڈاٹ پی کے) خیبرپختونخوا میں سکیورٹی فورسز نے خفیہ اطلاعات کی بنیاد پر دو الگ الگ کارروائیاں کرتے ہوئے بھارتی سرپرستی یافتہ 11 خوارج کو ہلاک کر دیا۔
پاک فوج کے شعبہ تعلقات عامہ (آئی ایس پی آر) کے مطابق سکیورٹی فورسز نے ضلع شمالی وزیرستان میں خوارج کی موجودگی کی اطلاع پر انٹیلی جنس بنیادوں پر آپریشن کیا، جہاں مؤثر کارروائی اور شدید فائرنگ کے تبادلے کے بعد 6 خوارج کو جہنم واصل کر دیا گیا۔
دوسری جانب ضلع کرم میں پولیس اور سکیورٹی فورسز نے مشترکہ انٹیلی جنس آپریشن کے دوران فائرنگ کے تبادلے میں مزید 5 خوارج کو ہلاک کر دیا۔
آئی ایس پی آر کے مطابق ہلاک ہونے والے خوارج کے قبضے سے اسلحہ اور گولہ بارود بھی برآمد ہوا، یہ عناصر سکیورٹی فورسز اور قانون نافذ کرنے والے اداروں پر حملوں، دہشت گردی کی کارروائیوں اور بے گناہ شہریوں کی ٹارگٹ کلنگ میں ملوث رہے تھے۔
ترجمان کے مطابق علاقے میں کسی بھی ممکنہ بھارتی سرپرستی یافتہ خارجی کے خاتمے کے لیے سرچ اور کلیئرنس آپریشن بدستور جاری ہیں۔
واضح رہے کہ وفاقی ایپکس کمیٹی کی جانب سے نیشنل ایکشن پلان کے تحت منظور شدہ وژن عزمِ استحکام کے مطابق ملک سے غیر ملکی حمایت یافتہ دہشت گردی کے مکمل خاتمے کے لیے سکیورٹی فورسز اور قانون نافذ کرنے والے اداروں کی انسداد دہشت گردی مہم پوری قوت سے جاری ہے۔
صدر مملکت آصف علی زرداری نے شمالی وزیرستان اور کرم میں کامیاب کارروائیوں پر سکیورٹی فورسز کی پیشہ ورانہ مہارت کو سراہتے ہوئے کہا ہے کہ فتنہ الخوارج کے مکمل خاتمے تک جدوجہد جاری رکھی جائے گی۔
وزیراعظم شہباز شریف نے کہا کہ دہشت گردی کے عفریت کے مکمل خاتمے تک اس کے خلاف جنگ جاری رہے گی، اور ہمارے بہادر افسران و جوانوں کی موجودگی میں دشمن پاکستان کی طرف میلی آنکھ سے دیکھنے کی جرأت نہیں کر سکتا۔
