حکومت کا بجلی صارفین کے لیے بڑا ریلیف

اسلام آباد (جانوڈاٹ پی کے)وفاقی حکومت نے بجلی صارفین کو مزید ریلیف فراہم کرنے کی تیاری شروع کر دی ہے، جس کے تحت آئی ایم ایف کی شرط کے مطابق عائد کی جانے والی کیپٹو پاور لیوی سے حاصل رقم بجلی کے نرخوں میں کمی کے لیے استعمال کی جائے گی۔

حکومتی ذرائع کے مطابق لیوی سے حاصل ہونے والی رقم کو ماہانہ بنیادوں پر بجلی صارفین کو ریلیف دینے کے لیے استعمال کیا جائے گا، اور جیسے جیسے کیپٹو پاور لیوی کی شرح میں اضافہ ہوگا، بجلی کے نرخوں میں زیادہ ریلیف ممکن ہو سکے گا۔

وفاقی کابینہ نے پہلے ہی منظوری دے دی ہے کہ کیپٹو پاور پلانٹس سے حاصل ہونے والا فائدہ بجلی صارفین تک منتقل کیا جائے گا۔ ماہانہ جمع ہونے والی لیوی کا فائدہ دو ماہ کے وقفے سے بجلی کے نرخوں میں ایڈجسٹ کیا جائے گا۔

منصوبے کے مطابق کیپٹو پاور پلانٹس پر مرحلہ وار 20 فیصد تک لیوی عائد کی جائے گی۔ فوری طور پر 5 فیصد لیوی نافذ کر دی گئی ہے، جبکہ دوسرے مرحلے میں یہ شرح 10 فیصد تک بڑھائی جائے گی۔ فروری 2026 میں لیوی 15 فیصد اور اگست 2026 میں 20 فیصد تک پہنچ جائے گی، جس سے حاصل رقم پاور سیکٹر کے تمام کیٹیگریز کے بجلی صارفین کے ٹیرف میں کمی کے لیے استعمال ہوگی۔

حکومتی ذرائع کے مطابق لیوی کی عدم ادائیگی کی صورت میں کیپٹو پاور پلانٹس کے خلاف کارروائی کی جائے گی اور مستقل ڈیفالٹ کی صورت میں متعلقہ پلانٹ کو گیس کی فراہمی منقطع کر دی جائے گی۔ ہر کیپٹو پاور پلانٹ گیس یا ایل این جی کے استعمال پر وفاقی حکومت کو لیوی ادا کرنے کا پابند ہوگا۔