لاہور کی نجی یونیورسٹی میں طالبہ کی دوسری منزل سے چھلانگ، حالت تشویشناک

لاہور(جانوڈاٹ پی کے) لاہور کی ایک نجی یونیورسٹی میں 21 سالہ طالبہ نے دوسری منزل سے چھلانگ لگا کر خودکشی کی کوشش کی، جس کے نتیجے میں وہ شدید زخمی ہو گئی۔ طالبہ کو تشویشناک حالت میں فوری طور پر ہسپتال منتقل کر دیا گیا ہے۔

پولیس کے مطابق خودکشی کی کوشش کرنے والی طالبہ کی شناخت فاطمہ کے نام سے ہوئی ہے، جو ڈی فارم کی طالبہ ہے۔ واقعے میں طالبہ کی دونوں ٹانگیں ٹوٹ گئی ہیں تاہم ڈاکٹرز کے مطابق اس کی حالت خطرے سے باہر ہے۔

پولیس حکام کا کہنا ہے کہ فاطمہ کو یونیورسٹی میں داخلہ لیے اڑھائی سے تین ماہ کا عرصہ ہوا تھا اور اس کی حاضری 90 فیصد سے زائد تھی، جبکہ غیر حاضری کا کوئی مسئلہ سامنے نہیں آیا۔

پولیس کے مطابق طالبہ کا موبائل فون تحویل میں لے لیا گیا ہے اور موبائل فون سمیت دیگر شواہد کی روشنی میں تحقیقات جاری ہیں۔ طالبہ کے ہوش میں آنے کے بعد مزید حقائق سامنے آنے کی توقع ہے۔

واضح رہے کہ چند روز قبل اسی نجی یونیورسٹی میں ڈی فارم کے ایک اور طالبعلم نے بھی عمارت سے کود کر خودکشی کی تھی، جس کے نتیجے میں وہ جان کی بازی ہار گیا تھا، جس پر تعلیمی ادارے میں سیکیورٹی اور طلبہ کی ذہنی صحت سے متعلق خدشات میں اضافہ ہو گیا ہے۔