’اسلام آباد تا لاہور‘ تحریک تحفظ آئین پاکستان کا عوامی رابطہ مہم شروع کرنے کا اعلان

اسلام آباد (جانوڈاٹ پی کے) تحریک تحفظ آئین پاکستان نے 8 جنوری سے ملک بھر میں عوامی رابطہ مہم شروع کرنے کا فیصلہ کر لیا ہے۔

ذرائع کے مطابق اپوزیشن اتحاد رواں ماہ 8 جنوری کو بذریعہ جی ٹی روڈ عوامی رابطہ مہم کا آغاز کرے گا، جس میں محمود خان اچکزئی، علامہ راجہ ناصر عباس سمیت دیگر اہم سیاسی رہنما شرکت کریں گے۔

ذرائع کا کہنا ہے کہ اپوزیشن اتحاد کی یہ عوامی رابطہ مہم مسلسل تین روز تک جاری رہے گی۔ مہم کا آغاز وفاقی دارالحکومت اسلام آباد سے ہوگا جبکہ اس کا اختتام صوبائی دارالحکومت لاہور میں کیا جائے گا۔

سیاسی مبصرین کے مطابق اس عوامی رابطہ مہم کا مقصد آئین کی بالادستی، جمہوریت کے استحکام اور عوامی حقوق کے تحفظ کے لیے حمایت حاصل کرنا ہے۔