’’بلی تھیلےسے باہر‘‘وینزویلا میں تیل اور قدرتی وسائل تک مکمل رسائی،ورنہ پھر حملہ ہوگا، ٹرمپ کی دھمکی

واشنگٹن (مانیٹرنگ ڈیسک) امریکی صدر ڈونلڈ ٹرمپ نے وینزویلا کو سخت دھمکی دیتے ہوئے کہا ہے کہ اگر وینزویلا نے درست رویہ اختیار نہ کیا تو امریکا دوبارہ فوجی حملہ کر سکتا ہے۔

ایئر فورس ون میں صحافیوں سے گفتگو کرتے ہوئے صدر ٹرمپ کا کہنا تھا کہ امریکا کو وینزویلا میں تیل اور دیگر قدرتی وسائل تک مکمل رسائی حاصل ہونی چاہیے، اگر وینزویلا نے امریکی مطالبات نہ مانے تو امریکا دوسرا حملہ بھی کرے گا۔

امریکی صدر نے وینزویلا میں اقتدار سنبھالنے والی نائب صدر ڈیلسی روڈریگز اور خطے کے دیگر ممالک کو بھی دھمکیاں دیتے ہوئے کہا کہ اگر ڈیلسی روڈریگز نے درست اقدامات نہ کیے تو انہیں نکولس مادورو سے بھی زیادہ بھاری قیمت چکانا پڑے گی۔ انہوں نے کہا کہ ڈیلسی روڈریگز کو امریکی مطالبات تسلیم کرنا ہوں گے ورنہ سنگین نتائج کا سامنا کرنا پڑ سکتا ہے۔

صدر ٹرمپ کا کہنا تھا کہ وینزویلا ممکن ہے امریکی مداخلت کا آخری ملک نہ ہو۔ انہوں نے گرین لینڈ کا ذکر کرتے ہوئے کہا کہ امریکا کو گرین لینڈ کی ضرورت ہے کیونکہ یہ امریکی دفاع کے لیے نہایت اہم ہے اور اس وقت چینی اور روسی جہازوں سے گھرا ہوا ہے۔

کیوبا کے حوالے سے صدر ٹرمپ نے سخت الفاظ استعمال کرتے ہوئے دعویٰ کیا کہ کیوبا کی حکومت جلد خود ہی گر جائے گی اور ممکن ہے فوجی مداخلت کی ضرورت ہی نہ پڑے، کیونکہ کیوبا کی آمدنی کا بڑا ذریعہ وینزویلا تھا جو اب ختم ہو چکا ہے۔

کولمبیا سے متعلق بات کرتے ہوئے امریکی صدر نے کہا کہ وہاں ایک ایسا شخص حکومت چلا رہا ہے جو کوکین بنانے اور اسے امریکا فروخت کرنے میں دلچسپی رکھتا ہے، تاہم وہ زیادہ عرصے تک ایسا نہیں کر سکے گا۔ ایک سوال کے جواب میں صدر ٹرمپ نے کہا کہ کولمبیا کی موجودہ حکومت کے خلاف امریکی فوجی کارروائی کے امکان کا سن کر انہیں اچھا لگا۔

صدر ٹرمپ نے میکسیکو کو بھی خبردار کرتے ہوئے کہا کہ اگر میکسیکو نے اپنا نظام درست نہ کیا تو امریکا کو کوئی نہ کوئی قدم اٹھانا پڑے گا۔

بھارت کی جانب سے روسی تیل کی درآمدات کے معاملے پر گفتگو کرتے ہوئے صدر ٹرمپ نے کہا کہ بھارتی وزیر اعظم نریندر مودی جانتے تھے کہ وہ اس معاملے پر خوش نہیں ہیں۔ ٹرمپ نے کہا کہ مودی اچھے آدمی ہیں اور وہ مجھے خوش کرنا چاہتے تھے، انہیں معلوم تھا کہ مجھے خوش کرنا ضروری ہے۔

امریکی صدر نے کہا کہ امریکا تجارت کرتا ہے اور بھارت پر بہت جلد مزید ٹیرف عائد کیے جا سکتے ہیں، جبکہ بھارت پر مزید محصولات بڑھانا اس کے لیے بہت نقصان دہ ثابت ہو گا۔

خیال رہے کہ امریکا نے روسی تیل کی خریداری کے معاملے پر بھارت پر بعض دیگر ممالک کے مقابلے میں زیادہ ٹیرف عائد کر رکھے ہیں۔