تحریک تحفظ آئین پاکستان کا قومی مذاکراتی کمیٹی کی کانفرنس میں شرکت سے انکار

اسلام آباد(جانوڈاٹ پی کے) قومی مذاکراتی کمیٹی نے اپنی مجوزہ قومی کانفرنس کے انعقاد کے سلسلے میں تحریک تحفظ آئین پاکستان سے رابطہ کرتے ہوئے شرکت کی دعوت دی، تاہم تحریک تحفظ آئین پاکستان نے کانفرنس میں شرکت سے انکار کر دیا ہے۔

ذرائع کے مطابق تحریک تحفظ آئین پاکستان کا کہنا ہے کہ انہیں آج دعوت نامہ موصول ہوا، مگر انہوں نے قومی کانفرنس میں شرکت نہ کرنے کا فیصلہ کیا ہے۔ ذرائع کا کہنا ہے کہ بانی پی ٹی آئی عمران خان نے مذاکرات کا اختیار تحریک تحفظ آئین پاکستان کو دیا ہے اور کسی بھی قسم کے مذاکرات اسی پلیٹ فارم کے تحت ہوں گے۔

ذرائع نے مزید بتایا کہ تحریک تحفظ آئین پاکستان کا مؤقف ہے کہ مذاکرات کسی اور فورم کے بجائے صرف تحریک تحفظ آئین پاکستان کے پلیٹ فارم سے ہی کیے جائیں گے۔

واضح رہے کہ قومی مذاکراتی کمیٹی کی قومی کانفرنس 7 جنوری کو اسلام آباد میں منعقد کی جائے گی، جس میں مسلم لیگ (ن)، پیپلز پارٹی، تحریک انصاف، جمعیت علمائے اسلام، جماعت اسلامی کو شرکت کی دعوت دینے کا فیصلہ کیا گیا ہے۔

اس کے علاوہ ایم کیو ایم، ق لیگ، بلوچستان عوامی پارٹی، عوامی نیشنل پارٹی اور دیگر سیاسی جماعتوں کو بھی کانفرنس میں مدعو کیا جائے گا۔