پنجاب میں امراضِ قلب کے لیے جدید انٹراویسکولر سرجری متعارف کرانے کا فیصلہ
لاہور(جانوڈاٹ پی کے) پنجاب میں دل کے مریضوں کے علاج کے لیے انٹراویسکولر سرجری کی جدید ترین تکنیک متعارف کرانے کا فیصلہ کر لیا گیا ہے۔ وزیراعلیٰ پنجاب مریم نواز شریف سے اوکلاہوما ہارٹ ہسپتال کے چیئرمین ڈاکٹر نعیم طاہرخیلی کی قیادت میں امریکی ڈاکٹروں کے وفد نے ملاقات کی، جس میں مقامی ڈاکٹروں کو جدید تکنیک کی تربیت دینے پر اتفاق ہوا۔
بریفنگ میں بتایا گیا کہ انٹراویسکولر سرجری روایتی اوپن ہارٹ سرجری کے مقابلے میں زیادہ محفوظ اور جدید متبادل ہے۔ وزیراعلیٰ نے جناح انسٹی ٹیوٹ آف کارڈیالوجی اور نواز شریف میڈیکل سٹی میں اس جدید علاج کی سہولت فراہم کرنے اور جدید طبی آلات کی خریداری کی ہدایت کی۔
