پنجاب بھر میں دھند کا راج،نظام زندگی مفلوج،موٹرویز بند

لاہور (جانوڈاٹ پی کے)پنجاب کے مختلف اضلاع میں شدید دھند کے باعث نظامِ زندگی بری طرح متاثر ہو گیا ہے، جبکہ حدِ نگاہ انتہائی کم ہونے پر موٹروے پولیس نے حفاظتی اقدامات کے تحت موٹرویز کے متعدد حصے ٹریفک کے لیے بند کر دیے ہیں۔

این ڈی ایم اے نے آئندہ تین روز کے دوران جنوبی اور وسطی پنجاب سمیت ملک کے مختلف علاقوں میں شدید دھند کے امکانات کے پیش نظر الرٹ جاری کر دیا ہے اور شہریوں کو غیر ضروری سفر سے گریز کی ہدایت کی ہے۔

موٹروے پولیس کے مطابق دھند کے باعث موٹروے ایم ٹو لاہور سے کوٹ مومن، ایم تھری درخانہ سے فیض پور، ایم فور شیر شاہ سے پنڈی بھٹیاں اور ایم الیون لاہور مین ٹول پلازہ سے سمبڑیال تک ہر قسم کی ٹریفک معطل کر دی گئی ہے، جبکہ ملتان۔سکھر موٹروے ایم فائیو پر بھی آمدورفت عارضی طور پر بند رہی۔

محکمہ موسمیات کے مطابق آئندہ چند روز کے دوران لاہور، جھنگ، ملتان، خانیوال، میاں چنوں، ساہیوال اور دیگر وسطی و جنوبی پنجاب کے علاقوں میں شدید دھند چھائے رہنے کا امکان ہے۔ بالائی سندھ کے علاقے خصوصاً سکھر اور گرد و نواح میں بھی دھند متوقع ہے، جبکہ اسلام آباد اور راولپنڈی میں رات اور علی الصبح دھند پڑنے کا امکان ظاہر کیا گیا ہے۔

ملک کے بیشتر حصوں میں مجموعی طور پر موسم خشک اور مستحکم رہنے کی پیش گوئی کی گئی ہے۔ اسلام آباد اور راولپنڈی میں دن کے اوقات میں دھوپ برقرار رہے گی جبکہ درجہ حرارت 4 سے 6 ڈگری سینٹی گریڈ کے درمیان رہنے کا امکان ہے۔ لاہور میں درجہ حرارت 7 سے 9 اور ملتان میں 6 سے 8 ڈگری سینٹی گریڈ رہنے کی توقع ہے، تاہم صبح کے وقت دھند حدِ نگاہ کو متاثر کر سکتی ہے۔

ادھر پشاور میں موسم نسبتاً معتدل رہنے کا امکان ہے جبکہ کوئٹہ اور اس کے گرد و نواح میں سردی کی شدت برقرار رہے گی اور درجہ حرارت نقطہ انجماد سے نیچے رہ سکتا ہے۔ گلگت بلتستان اور بالائی علاقوں میں موسم سرد اور خشک رہے گا، جبکہ کراچی میں موسم گرم اور خشک رہنے کے ساتھ سمندری ہوائیں چلنے سے موسم خوشگوار رہنے کی توقع ہے۔

محکمہ موسمیات اور موٹروے پولیس نے شہریوں اور مسافروں کو ہدایت کی ہے کہ دھند کے دوران حدِ رفتار کم رکھیں، فوگ لائٹس کا استعمال کریں اور غیر ضروری سفر سے اجتناب کریں تاکہ کسی بھی ناخوشگوار واقعے سے بچا جا سکے۔