11مہینوں میں8جنگیں رکوائیں،امریکا اقوام متحدہ بن گیا،روس اور یوکرین کے مذاکرات آخری مراحل میں ہیں،ٹرمپ

واشنگٹن(جانو ڈاٹ پی کے )امریکی صدر ڈونلڈ ٹرمپ کا کہنا ہے کہ امریکا اب اصل اقوام متحدہ بن چکا ہے،11مہینوں میں8جنگوں کو ختم کیا ہے۔

امریکی صدر ڈونلڈ ٹرمپ نے تھائی لینڈ اور کمبوڈیا کے درمیان جنگ بندی کا خیرمقدم کرتے ہوئے سوشل میڈیا پر جاری بیان میں کہا خوشی ہے تھائی لینڈ اور کمبوڈیا کے درمیان جنگ رک گئی ۔ امید ہے معاہدے کے بعد دونوں ملک امن سے رہیں گے۔ڈونلڈ ٹرمپ نے کہا کہ دونوں ملکوں کے رہنماؤں کو مبارکباد دیتا ہوں انہوں نے امن کیلئے تیز اور منصفانہ فیصلہ کیا، امریکا کو جنگ بندی میں مدد کرنے پر فخر ہے۔ صدرڈونلڈ ٹرمپ نے کہا کہ 11 مہینوں میں آٹھ جنگیں روکوائیں، امریکا ہی اب اصل اقوام متحدہ بن چکا ہے۔ان کا مزید کہنا تھا کہ عالمی تنازعات کے حل میں کسی نے مدد نہیں کی ۔۔روس یوکرین جنگ رکوانے میں بھی کوئی کردار ادا نہیں کررہا، اقوام متحدہ کو عالمی امن کے لیے سرگرم ہونا چاہیے۔

روس اور یوکرین کے درمیان جنگ بندی سے متعلق امریکی صدر ڈونلڈ ٹرمپ اوریوکرینی صدر ولادیمیر زیلنسکی کی ملاقات بغیر کسی بڑے بریک تھرو کے ختم ہوگئی۔

فلوریڈا میں ٹرمپ کی رہائش گاہ مارالاگو میں امریکی و  یوکرینی صدر کی ملاقات 2 گھنٹے سے زائد تک جاری رہی۔

ملاقات میں روس یوکرین جنگ کے خاتمے سے متعلق امن منصوبے کے مختلف امور زیر غور  آئے تاہم یوکرین کے مشرقی علاقے ڈونباس کے مستقبل کے بارے میں غیر یقینی صورتحال تاحال برقرار ہے اور دونوں رہنما ڈونباس سے متعلق کسی نتیجے پر نہیں پہنچ سکے۔