کراچی : ایف آئی اے نے مائیگرنٹ اسمگلنگ اور ویزا فراڈ میں ملوث 6 انسانی اسمگلرز گرفتار کر لئے

کراچی(جانوڈاٹ پی کے) ایف آئی اے نے مائیگرنٹ اسمگلنگ اور ویزا فراڈ میں ملوث 6 انسانی اسمگلرز کو گرفتار کر لیا۔

ایف آئی اے انسداد انسانی اسمگلنگ سرکل ملتان، بہاولپور اور ڈی جی خان نے کارروائیوں کے دوران مائیگرنٹ اسمگلنگ اور ویزا فراڈ میں ملوث 6 ملزمان کو گرفتار کر لیا۔

گرفتار ملزمان میں محمد قاسم، عبدالمنان، شکیل احمد، اجمل، سجاد حسین اور محمد عرفان شامل ہیں۔ ملزمان کو لودھراں، بہاولپور، مظفر گڑھ اور ڈی جی خان کے مختلف علاقوں سے گرفتار کیا گیا۔

حکام کے مطابق ملزم محمد قاسم نے شہریوں کو عراق ملازمت پر بھجوانے کا جھانسہ دے کر 3 لاکھ 50 ہزار روپے بٹورے۔ ملزم عبدالمنان نے شہری کو سعودی عرب ملازمت کا جھانسہ دے کر 7 لاکھ 90 ہزار روپے ہتھیائے۔

ملزم شکیل احمد نے شہریوں کو عراق ملازمت پر بھجوانے کا جھانسہ دے کر 14 لاکھ 60 ہزار روپے بٹورے، ملزم اجمل نے شہریوں کو عراق ملازمت پر بھجوانے کا جھانسہ دے کر 8 لاکھ روپے وصول کیے جبکہ ملزم سجاد حسین نے شہریوں کو سعودی عرب ملازمت پر بھجوانے کا جھانسہ دے کر 2 لاکھ 50 ہزار روپے بٹورے۔

حکام نے بتایا کہ گرفتار ملزم محمد عرفان 3 مقدمات میں ایف آئی اے کو مطلوب ہے۔ ملزم متعدد شہریوں کو بیرون ملک بھجوانے کا جھانسہ دے کر لاکھوں روپے بٹور چکا ہے۔

گرفتار ملزمان شہریوں کو بیرون ملک بھجوانے میں ناکام رہے۔ ملزمان بھاری رقوم وصول کر کے روپوش ہو گئے تھے۔ملزمان سے مزید تفتیش جاری ہے۔