محکمہ پاسپورٹ کا درخواستوں اور کارکردگی کی رئیل ٹائم مانیٹرنگ کیلئے جدید نظام متعارف

اسلام آباد(جانوڈاٹ پی کے)محکمہ پاسپورٹ نے درخواستوں، پرنٹنگ اور کارکردگی کی مانیٹرنگ کا نیا نظام متعارف کرا دیا۔

محکمہ پاسپورٹ کی جانب سے جاری اعلامیے میں کہا گیا ہے کہ ڈی جی پاسپورٹ کے احکامات پر ہیڈکوارٹرز میں خصوصی 24/7 مانیٹرنگ روم قائم کر دیا گیا ہے جس میں ڈیجیٹل اینٹگریٹڈ ڈیش بورڈ سے ڈیلی آپریشنز کی مانیٹرنگ اور ایولیوشن ہو گی۔

اعلامیے میں بتایا گیا ہے کہ نئے نظام کے ذریعے پاسپورٹ درخواستوں اور ڈیلیوری کی رئیل ٹائم مانیٹرنگ کی جا سکے گی، نئے سسٹم کے تحت پاسپورٹ کے اپلائی سے ڈیلیوری تک ہر مرحلے پر نگرانی کی جائے گی۔

اعلامیے کے مطابق نئے مانیٹرنگ سسٹم کے تحت پاسپورٹ دفاتر میں رش کی بھی خودکار نشاندہی کی جاسکے گی، جدید مانیٹرنگ سسٹم سے اسٹاف کی کارکردگی، پاسپورٹ پرنٹنگ کا عمل مانیٹر کیا جائے گا۔ اس کے علاوہ نیٹ ورک مینجمنٹ سسٹم کے تحت بیک لاگ اور مشینری اسٹیٹس بھی مانیٹر ہوگا۔

ڈی جی پاسپورٹس مصطفیٰ جمال قاضی کا کہنا ہے کہ مانیٹرنگ کے جدید نظام سے محکمہ پاسپورٹس کی کارکردگی کو مزید بہتر بنایا جائے گا، افسران و عملہ کی کارکردگی سے لےکر تمام دفاتر میں شہریوں کا رش بھی مانیٹر ہوگا، نشاندہی کے بعد مسائل کو فی الفور حل کرنے کا نظام بھی متعارف کرایا گیا ہے۔