پاکستان اور لیبیا میں4ارب ڈالرکے ہتھیار فروخت کرنے کا معاہدہ

اسلام آباد(جانو ڈاٹ پی کے)پاکستان نے لیبیئن نیشنل آرمی کو 4 ارب ڈالر کے ہتھیار فروخت کرنےکا معاہدہ کیا ہے جس کے تحت لیبیا کو 16 جے ایف 17 لڑاکا طیارے بھی فراہم کیے جائیں گے۔4پاکستانی اہلکاروں نے تصدیق کی ہےکہ پاکستان نے لیبیا کی نیشنل آرمی (ایل این اے) کو4ارب ڈالر سے زائد مالیت کا فوجی سازوسامان فروخت کرنےکا معاہدہ کیا ہے۔معاہدہ پاکستان کی دفاعی برآمدات کے اب تک کے سب سے بڑے معاہدوں میں سے ایک ہے۔

رپورٹ کے مطابق گزشتہ ہفتے لیبیا کے شہر بن غازی میں پاکستانی فوج کے سربراہ فیلڈ مارشل عاصم منیر اور لیبیا کی نیشنل آرمی کے نائب کمانڈر اِن چیف صدام خلیفہ حفتر کے درمیان ہونے والی ملاقات کے بعد اسلحے کی خریداری کے معاہدے کوحتمی شکل دی گئی۔

معاہدے کو حتمی شکل دیے جانے سے قبل تک جو فہرست سامنے آئی تھی اس کے مطابق پاکستان معاہدے کے تحت لیبیا نیشنل آرمی کو 16 جے ایف-17 لڑاکا طیارے اور 12 سپر مشاق تربیتی طیارے فراہم کرےگا۔رائٹرز کے مطابق4 پاکستانی اہلکاروں میں سے ایک نے اس فہرست کی تصدیق کی جبکہ دوسرے اہلکار نے کہا کہ فہرست میں شامل تمام اسلحہ معاہدے کا حصہ ہے تاہم وہ درست تعداد بتانے سے قاصر رہے۔ ایک اور پاکستانی اہلکار کے مطابق اس معاہدے میں زمینی، بحری اور فضائی سازوسامان کی فروخت شامل ہے، جس کی فراہمی ڈھائی سال کے عرصے میں مکمل ہوگی۔خبر ایجنسی کے مطابق لیبیا پر اقوام متحدہ کی جانب سے اسلحےکی خریداری پر پابندی عائد ہے۔ تاہم پاکستانی عہدیدار کا کہنا ہے کہ معاہدے سے اقوام متحدہ کی کسی پابندی کی خلاف ورزی نہیں ہوئی ہے۔لیبیا نیشنل آرمی کے میڈیا چینل نے بھی پاکستان سے دفاعی تعاون کا معاہدہ ہونے کی تصدیق کی ہے۔خبر ایجنسی کا کہنا ہے کہ پاکستان نے ستمبر میں سعودی عرب سے بھی اسٹریٹیجک دفاعی معاہدہ کیا ہے۔