سندھ ہائیکورٹ: طارق جہانگیری کی درخواست پر سماعت چھٹیوں کے بعد تک ملتوی

کراچی(جانوڈاٹ پی کے) اسلام آباد ہائیکورٹ کے سابق جج طارق محمود جہانگیری کے ڈگری معاملے پر توہین عدالت کی درخواست پر سماعت سرما کی تعطیلات کے بعد تک ملتوی کر دی گئی۔

جامعہ کراچی کے وائس چانسلر اور رجسٹرار کے خلاف توہین عدالت کی درخواست کی سماعت ہوئی، وائس چانسلر جامعہ کراچی پروفیسر خالد محمود عراقی اور رجسٹرار پروفیسر عمران احمد صدیقی نے عدالت میں جوابی حلف نامے جمع کروا دیئے۔

رجسٹرار جامعہ کراچی کے مطابق اسلام آباد ہائی کورٹ ڈگری کے معاملے پر حتمی فیصلہ سنا چکی ہے، توہین عدالت کی درخواست دائر ہونے کے بعد اسلام آباد ہائی کورٹ نے فیصلہ سنایا، توہین عدالت کی درخواست غیر مؤثر ہوچکی ہے، خارج کی جائے۔

رجسٹرار کی جانب سے مزید کہا کہ سندھ ہائی کورٹ کے تین اکتوبر کے فیصلے کے بعد کوئی کارروائی شروع نہیں کی گئی، جامعہ کراچی نے عدالتی احکامات کے مطابق کوئی احکامات یا نوٹیفکیشن جاری نہیں کیا، اسلام آباد ہائی کورٹ نے ایچ ای سی کے ذریعے جامعہ کراچی کا ریکارڈ طلب کیا تھا۔

وائس چانسلر جامعہ کراچی نے بتایا کہ اسلام آباد ہائی کورٹ کے احکامات کے مطابق ریکارڈ بغیر کسی ردوبدل عدالت میں پیش کیا گیا۔

عدالت نے درخواست گزار طارق محمود جہانگیری کے وکیل کو فریقین کے جواب وصول کرنے کی ہدایت کی، بیرسٹر صلاح الدین احمد نے کہا کہ کیس فوری نوعیت کا ہے جلدی سنا جائے، اس پر جسٹس یوسف علی سعید نے کہا کہ اس بنچ کا آج آخری دن ہے، تعطیلات کے بعد روسٹر کے مطابق بنچ سماعت کرے گا۔

عدالت نے آئندہ سماعت تک حکم امتناع میں توسیع کردی، عدالت نے توہین عدالت کی درخواست کی سماعت سردیوں کی تعطیلات کے بعد تک ملتوی کردی۔