موصوف صرف ہیروں کا کاروبار کرنے اقتدار میں آئے تھے،اُنہیں رعایت نہیں ملے گی،عظمیٰ بخاری

لاہور(جانوڈاٹ پی کے) صوبائی وزیر اطلاعات و نشریات عظمیٰ بخاری نے بانی پاکستان تحریکِ انصاف (پی ٹی آئی) پر تنقید کرتے ہوئے کہا ہے کہ وہ اقتدار میں صرف ہیروں کے کاروبار کے لیے آئے تھے اور انہیں رعایت نہیں دی جائے گی۔

عظمیٰ بخاری نے اپنے بیان میں کہا کہ بانی پی ٹی آئی نے چور دروازے سے اقتدار میں آنے کی کوشش کی اور ہر کسی کو چور اور ڈاکو کہنے کی عادت تھی، جبکہ حقیقت میں ان کے اپنے دور میں کرپشن اور چوری کے واقعات پیش آئے۔

انہوں نے الزام لگایا کہ فیض حمید کے ساتھ مبینہ گٹھ جوڑ کے ذریعے ایک مخصوص بیانیہ بنایا گیا جس کے تحت مخالفین کو چور اور ڈاکو قرار دیا گیا، اور اسی مبینہ گٹھ جوڑ کے نتیجے میں بانی پی ٹی آئی اقتدار میں آئے۔ علاوہ ازیں، آف شور کمپنی چیریٹی کے پیسوں کے استعمال کے الزامات بھی سامنے آئے۔

عظمیٰ بخاری نے دعویٰ کیا کہ بنی گالہ کی مبینہ جعلی دستاویزات کے باوجود پروجیکٹ فیض حمید کے تحت انہیں صادق و امین قرار دیا گیا۔مسلم لیگ (ن) کی رہنما نے کہا کہ بانی پی ٹی آئی کی مبینہ کرپشن اور چوری کی کہانیاں اب عام ہو چکی ہیں، اور یہ تاثر دیا گیا کہ وہ اقتدار میں صرف ہیروں کے کاروبار کے لیے آئے، لیکن حقیقت اس کے برعکس ہے۔

صوبائی وزیر اطلاعات نے مزید کہا کہ احتساب بلا امتیاز ہونا چاہیے اور قانون کی حکمرانی سب پر یکساں طور پر لاگو ہونی چاہیے۔