دبئی میں موسلا دھار بارشیں، شاپنگ مال زیرِ آب، لاکھوں افراد گھروں میں محصور
Flooding in Dubai, UAE early this morning. pic.twitter.com/P1ctovuz88
— Weather Monitor (@WeatherMonitors) December 19, 2025
دبئی (جانو ڈاٹ پی کے) متحدہ عرب امارات کے معروف شہر دبئی میں ہونے والی شدید اور غیر معمولی بارشوں نے نظامِ زندگی کو بری طرح متاثر کر دیا۔ موسلا دھار بارش کے باعث شہر کے کئی نشیبی علاقے زیرِ آب آ گئے جبکہ بڑے شاپنگ مالز، سڑکیں اور رہائشی عمارتیں پانی میں ڈوب گئیں۔
بارش کے نتیجے میں ٹریفک نظام مکمل طور پر درہم برہم ہو گیا، اہم شاہراہیں تالاب کا منظر پیش کرنے لگیں اور متعدد گاڑیاں پانی میں پھنس گئیں۔ میٹرو سروس متاثر ہوئی جبکہ کئی پروازیں تاخیر کا شکار ہوئیں یا منسوخ کر دی گئیں۔ حکام کے مطابق اچانک اور شدید بارش کے باعث نکاسیٔ آب کا نظام دباؤ کا شکار ہو گیا، جس سے پانی جمع ہونے کی صورتحال پیدا ہوئی۔
شاپنگ مالز میں پانی داخل ہونے کی ویڈیوز سوشل میڈیا پر تیزی سے وائرل ہو گئیں، جہاں دکانیں اور پارکنگ ایریاز پانی سے بھر گئے۔ لاکھوں شہری اور غیر ملکی باشندے گھروں میں محصور ہو کر رہ گئے جبکہ اسکولوں اور دفاتر میں حاضری بھی متاثر ہوئی۔
ریسکیو اداروں اور سول ڈیفنس کی ٹیمیں متاثرہ علاقوں میں امدادی سرگرمیوں میں مصروف رہیں۔ حکام نے شہریوں کو غیر ضروری سفر سے گریز اور احتیاطی تدابیر اختیار کرنے کی ہدایت کی ہے۔ ماہرین کے مطابق یہ بارشیں موسمیاتی تبدیلیوں کے اثرات کی واضح مثال ہیں، جس نے خلیجی ممالک میں بھی غیر متوقع موسم کو جنم دیا ہے۔
