متحدہ عرب امارات کا ٹریفک جام سے نمٹنے کیلئے نئے ٹرانسپورٹ منصوبوں کا اعلان

دبئی(جانوڈاٹ پی کے) متحدہ عرب امارات میں بڑھتی آبادی اور ٹریفک جام سے نمٹنے کے لیے  نیا منصوبہ متعارف کروادیا گیا۔

متحدہ عرب امارات میں اگلے 5 سال کے لیے روڈ اور ٹرانسپورٹ منصوبے کا اعلان کردیا گیا ہے، منصوبے پر  170 ارب درہم (تقریباً 13 کھرب پاکستانی روپے) خرچ ہوں گے۔

منصوبے کا اعلان اماراتی وزیر توانائی و انفراسٹرکچر سہیل المزروعی نے کیا، حکام کے مطابق روڈ اور ٹرانسپورٹ پروجیکٹ پر 46 ارب ڈالرز خرچ ہوں گے، منصوبے کا مقصد عرب امارات میں ٹریفک کے دباؤ کو کم کرنا ہے۔

حکام کے مطابق منصوبے کے تحت اہم شاہراہوں کی توسیع ہوگی اور پبلک ٹرانسپورٹ کی بہتری اور ہائی اسپیڈ ریل کے منصوبے شروع کیے جائیں گے۔

اماراتی حکام کا کہنا ہے کہ عرب امارات کی الاتحاد روڈ کو 12 لینز تک وسیع کردیا جائے گا، ایمرٹس روڈ اور شیخ محمد بن زائد روڈ کو 10 لینز تک بڑھایا  جائے گا۔

نئے منصوبے سے سڑکوں کی گنجائش میں 45 سے 65 فیصد اضافہ ہوگا، منصوبہ مکمل ہونے پر لوگوں کے سفر کے وقت میں نمایاں کمی آئے گی۔

حکام کا کہنا ہے کہ متحدہ عرب امارات کی آبادی 1 کروڑ 10 لاکھ تک پہنچ چکی ہے، جبکہ دبئی کی آبادی 40 لاکھ سے تجاوز کر گئی ہے۔