یورپ اور یوکرین کا جنگ بندی کیلئے 12 نکاتی امن منصوبہ تیار، ٹرمپ کی سربراہی میں امن بورڈ تشکیل دینے کی تجویز

برسلز/کیف(مانیٹرنگ ڈیسک) یورپی ممالک اور یوکرین نے روس کے ساتھ جاری جنگ کے خاتمے کے لیے 12 نکاتی امن منصوبہ تیار کر لیا ہے، جس کے تحت جنگ کو موجودہ محاذی لائنوں پر روکنے کی تجویز دی گئی ہے۔

بلومبرگ کے مطابق اس منصوبے کی نگرانی ایک امن بورڈ کرے گا جس کی سربراہی امریکی صدر ڈونلڈ ٹرمپ کریں گے۔ منصوبے میں شامل تجاویز کے تحت روس اور یوکرین دونوں فریق جنگ بندی پر رضامندی ظاہر کریں گے اور مزید علاقائی پیش قدمی سے گریز کریں گے۔

منصوبے میں روس کی جانب سے جبری طور پر لے جائے گئے تمام بچوں کی واپسی، قیدیوں کا تبادلہ، اور یوکرین کو سیکیورٹی ضمانتوں اور جنگی نقصانات کے ازالے کے لیے فنڈز فراہم کرنے کی شقیں شامل ہیں۔ اس کے ساتھ یوکرین کو یورپی یونین میں تیز رفتار شمولیت کا راستہ دینے کی بھی تجویز دی گئی ہے۔

روس پر عائد پابندیاں بتدریج نرم کی جائیں گی، تاہم روس کے 300 ارب ڈالر کے منجمد اثاثے اسی صورت میں واپس کیے جائیں گے جب ماسکو یوکرین کی تعمیرِ نو میں مالی تعاون پر آمادہ ہوگا۔

ذرائع کے مطابق، ماسکو اور کیف کے درمیان قبضے میں موجود علاقوں کی آئندہ حیثیت پر مذاکرات ہوں گے، تاہم یورپ اور یوکرین ان علاقوں کو قانونی طور پر روسی حصہ تسلیم نہیں کریں گے۔

امریکی صدر ٹرمپ نے حالیہ بیان میں کہا کہ “دونوں ممالک کو وہیں رک جانا چاہیے جہاں اب ہیں، مزید خونریزی بند کریں اور بعد میں علاقے پر بات کریں۔”

یورپی رہنماؤں نے بھی موجودہ محاذی لائنوں پر فوری جنگ بندی کی حمایت کا اعلان کیا ہے، جبکہ جمعے کو “کوالیشن آف دی وِلنگ” کے اتحادی ممالک کی میٹنگ طلب کرلی گئی ہے۔

یوکرینی صدر ولادیمیر زیلینسکی نے کہا کہ “ہم جنگ کے ممکنہ اختتام کے قریب پہنچ گئے ہیں، اگرچہ حتمی نہیں کہا جا سکتا، لیکن صدر ٹرمپ کی کوششوں نے امن کی امید پیدا کی ہے۔”