فرانس میں 2سال کے دوران پانچویں وزیراعظم عہدے سے مستعفیٰ

پیرس(jano.pk)فرانس کے وزیراعظم سیبیسٹیئن لیکورنو نے اپنی تقرری کے صرف 26 دن بعد ہی استعفیٰ دے دیا۔عالمی خبر رساں ادارے کے مطابق یہ اعلان اُس وقت سامنے آیا جب ایلیزے پیلس نے پیر کی صبح ان کی صدر ایمانوئل میکرون سے ایک گھنٹے کی ملاقات کے بعد ان کے استعفے کی تصدیق کی۔

موجودہ حالات میں میرا آگے بڑھنا ناممکن تھا،سیاسی جماعتیں سمجھوتے پر تیار نہیں،سیبیسٹیئن لیکورنو

خیال رہے کہ فرانس میں دو سال کے دوران یہ پانچویں وزیراعظم کا استعفیٰ سامنے آیا ہے جب کہ ایک سال میں مستعفی ہونے والے تیسرے وزیراعظم ہیں۔لیکورنو نے وزارت عظمیٰ سے مستعفی ہونے کے بعد کہا کہ وزیراعظم ہونا ایک مشکل کام ہے لیکن موجودہ حالات میں میرا آگے بڑھنا ناممکن تھا۔ سیاسی جماعتیں سمجھوتے پر تیار نہیں، سب اپنی انا کے ساتھ کھڑے ہیں۔انھوں نے مختلف سیاسی دھڑوں پر شدید تنقید کی اور کہا کہ سب ایسے برتاؤ کر رہے ہیں جیسے صرف ان کے پاس ہی اکثریت ہو۔

لیکورنو کی کابینہ کو اپوزیشن نے سخت تنقید کا نشانہ بنایا کیونکہ اس میں زیادہ تر وزراء سابق وزیراعظم فرانسوا بیرو کی ٹیم سے ہی لیے گئے تھے۔مختلف جماعتوں نے اس کابینہ کو مسترد کرنے اور عدم اعتماد کی تحریک چلانے کی دھمکی دی۔فرانس میں گزشتہ دو برسوں میں یہ پانچواں وزیراعظم ہے جو حکومت سازی میں ناکام رہا۔

دائیں بازو کی نیشنل ریلی پارٹی (RN) کی رہنما مارین لی پین نے کہا کہ یہ مذاق اب ختم ہونا چاہیے۔ عوام تنگ آ چکے ہیں۔ واحد حل نئے انتخابات ہیں۔ایک اور وزیراعظم کے مستعفی ہونے پر فرانس کے صدر ایمانوئل میکرون کو اب تین راستوں میں سے ایک کا انتخاب کرنا ہوگا۔وہ ایک نیا وزیراعظم مقرر کرسکتے ہیں۔ قومی اسمبلی تحلیل کرکے نئے انتخابات کراسکتے ہیں یا خود ہی مستعفی ہوجائیں۔