میرے خلاف ریمارکس کیوں دیئے؟وکیل نے چیف جسٹس پر جوتا پھینک دیا

نئی دہلی(نیٹ نیوز)بھارتی”بُڈھا وکیل”چیف جسٹس پر برہم،نازیباالفاظ استعمال کرنے کے بعد جوتا بھی پھینک دیا۔دوران سماعت وکیل نے بھارتی چیف جسٹس  بی آر گوائی پر جوتا پھینک دیا۔بھارتی میڈیا کے مطابق پیر کو چیف جسٹس بی آر گوائی نے دن کا پہلا مقدمہ سننا شروع ہی کیا تھا کہ اچانک  71 سالہ وکیل نے  نعرے بازی شروع  کی اور چیف جسٹس آف انڈیا پر جوتا پھینک دیا۔پولیس کے مطابق ملزم وکیل کی شناخت راکیش کشور کے نام سے ہوئی ہے، جس نے صبح تقریباً 11:35بجے کورٹ نمبر1میں کارروائی کے دوران اپناجوتا اتار کر چیف جسٹس کی جانب پھینکا۔سکیورٹی اہلکاروں نے فوری طور پر جوتا پھینکنے والے شخص کو پکڑ لیا اور سپریم کورٹ کی سکیورٹی یونٹ کے حوالے کر دیا۔ابتدائی تفتیش میں پتہ چلا ہے کہ وکیل چیف جسٹس کے حالیہ ریمارکس سے ناراض تھا،جو مدھیا پردیش کے کھاجوراہو مندر سے متعلق ایک سماعت کے دوران دیے گئے تھے۔چیف جسٹس گوائی نے اس واقعے پر کوئی ردعمل ظاہر نہیں کیا اور وکلا کو کارروائی جاری رکھنے کی ہدایت دی۔