سونے کی قیمت میں اضافہ، فی تولہ 900 روپے مہنگا ہوکر 4 لاکھ 40 ہزار 836 روپے کا ہوگیا

کراچی(جانوڈاٹ پی کے) عالمی اور مقامی مارکیٹوں میں سونے کی قیمتوں میں اضافہ ریکارڈ کیا گیا ہے، بین الاقوامی بلین مارکیٹ میں سونا 9 ڈالر فی اونس مہنگا ہوگیا، جس کے بعد مقامی صرافہ بازاروں میں بھی فی تولہ قیمت بڑھ گئی۔

بین الاقوامی بلین مارکیٹ میں 9 ڈالر اضافے کے بعد سونے کی نئی قیمت 4 ہزار 183 ڈالر فی اونس ہوگئی۔

عالمی مارکیٹ میں اضافے کے اثرات مقامی صرافہ بازاروں میں بھی دیکھنے میں آئے، جہاں فی تولہ سونے کی قیمت 900 روپے بڑھ کر 4 لاکھ 40 ہزار 836 روپے کی سطح پر پہنچ گئی۔

اسی طرح 10 گرام سونے کی قیمت میں 771 روپے کا اضافہ ہوا، جس کے بعد نئی قیمت 3 لاکھ 77 ہزار 946 روپے ہوگئی۔

سونے کی قیمتوں میں حالیہ اضافے سے زیورات خریدنے والے صارفین کو مزید مہنگائی کا سامنا کرنا پڑسکتا ہے۔